Hemşaredarê Şaristanê Pîlî yê Amedî Selçuk Mizraklîyo ke 49 rojan ra nata verba destsernayîşê şaredarîyan ê HDP'yî xo ver dano, qalê mene ya xoverdayîşê xo kerd û muşahedeyê xo yê pêvînayîşanê Tirkîya û Ewropa pare kerdî.

Mizrakliyî vist vîrî ke verba çalakîyanê protestoyî roja destpêkî ra polîsan hêrişî kerdî û ard ziwan ke înan zî verê nê hêrişan de qet tewirê xo rê tawîz nêda. Cinî, ciwan, kal, doman her kes beşdarê nê xoverdayîşî bîyî ke wayîrê tewirêko biteredut ê.

Verba Rejîmê Şexsêkî...

Mizrakliyî bale ante ke nê wareyê xoverdayîşî de her roje mesajê xo erşawitî û va: "Rêxistinê komelî yê sivîlî yê Tirkîya, partîyê sîyasî, beşê cîya yê komelî, hunermendî, roşnvîrî tewrê çalakîyan bîyî. Coka ez wareyê geşkerdişê xoverdayîşî vîneno. No ware verba rejîmê şexsêkî û rejîmê zordarîye, sey wareyê erjê demokrasîyî û huqûqî, azadîya heqan ê merdiman, û verba darbeya sîyasî yo. No ware hêz dano meropolanê Tirkîya, heman wextî de mesajê 'Şima eşkenê qeraran bigêrê, la qerarê înan do îradeyê komelî de bikewê û abigêrê.' kesanê Tirkîya ra resneno. Coka bloka AKP-MHP'yî hînî meşrû nîya.‘‘

Mizrakliyî bale ante ke paştdayîşê komelî yê AKP-MHP'yî rê kêm bîyo û vat: "Êyê ke ganî proses bivînê û saz bikê muxalefetê sîyasî û komelî yê. Eke bieşkê gamanê xurtan bierzê do taxrîbatê komelî kêm bibê."