Fermandarîya Qeragehê Merkezê Pawitişê Şarî (MPŞ) bi wesîleya 4ê Nîsane rojbîyayîşê Rayberê Şarê Kurdî Abdullah Ocalanî hêzanê gerîlayan rê mesajêk erşawit. 

Meaaj wina yo:

''Ma 4ê Nîsane rojbîyayîşê Rayber Apoyî yê pêro embazan û Rayberîye fîraz kenê. Pê hêvîya ke ma Rayberîya azade reyde welatêkê azadî de biciwîyê ma soz û peymana berzkerdişê têkoşînî dibare kenê. Rojbîyayîşê Rayber Apoyî rojbîyayîşê kesêkî nîyo. 4ê Nîsano xo reyde rojbîyayîşo diyîn û rojbîyayîşo hîrêyîn awan kerd. 4ê Nîsane rojbîyayîşê azadîye û rojbîyayîşo yewîn o, rojbîyayîşo diyîn awanîya partîya ma ya, rojbîyayîşo hîrêyîn de  awanîya fikr, felsefe û îdeolojîya Rayberîye yo.

Ewro şero esas Îmrali de vera Rayberîya ma pê metodê şerê taybetî yeno kerdene. Seba ke Rayber Apo waştişê dewlete nêano ca, kerdişanê dewlete tesdîq nêkeno ewro vera Rayberîye şerêko winasên yeno kerdene. 14ê adare de derheqê weşîya Rayberîye de tay îdîayî medyaya komelkîye de weşanîyayî. Seba ke şarê ma pê moralî nêkewo Newroze îdîayê winasênî ameyî parekerdene. No zî beşêkê şerê psîkolojîkî yo ke vera şarê ma yeno caardene.

Dewleta tirke seba ke verê nêrazîbîyayîşan û çalakîyan bigêra waşt ke wa Serekîye keyeyê xo reyde pê telefonî qisey bikero. Nê pêvînayîşê telefonî de Rayberîya ma vat: 'No raşt nîyo, ma nê metodî qebul nêkenê. Dewlete şaşîye kena. Wina nêbeno ganî avûkatî bêrê pêvînayîşî.'

Tewiro ke Rayberîye telefon de mojna tewirêkê xoverdayîşî yo cidî yo. Embazê ma, Rayberîye, îdareyê ma û şarê ma ma pêro hê xo ver danê. Serekatîye vana 'No metod xelet o.' Aseno ke Rayberîye ser o tehluke esto. Eke ma nê wextê tarîxî de wayîrê erkanê xo nêvejîyê tehlukeyê serê Rayberîye do bizêdîyê. Coka ganî ma wayîrê erkanê xo vejîyê. Tewirê gerîlayan tîya de girîng o. Xoverdayîşê gerîlayan moral dano şarê ma.

Dewlete seba ke çalakîyanê şarê ma bîlaheq veja vana 'weşîya ci hol a, to dî telefon de zî qisey kerd. Şima hînî çita wazenê.' Dewlete pêvînayîşê rî bi rî rê destûr nêdana. Bêguman no zî tehluke yo.

Nika tehluke Rayberîye, şarê ma û erjanê şorişî ser o berdewam o. Ma set gerîlayanê azadîya Kurdîstanî wazenê wayîrê wezîfeyanê xo vejîyê û cewabê nê tehlukeyî bidê û rayîrê azadîye awan bikerê. Oyo ke hewce yo wedaritişê tecrîdî nê caardişê azadîya Rayberîye yo. Wextê ci ameyo ke Rayber Apo azad bibo. Pêro dinya, roşnvîr, hunermend, sendîkayî wina vanê.

Eke nê wextî de wayîrê erkanê xo vejîyê, têkoşînê şorişî berz bikerê, hînî rayîrê azadîya Rayber Apoyî abeno. Ma wazenê nê esasî ser o nêzdîyê erkanê serra 2021î vejîyê. Ma wazenê pê qerardarî, pê soz û peymane rojbîyayîşê Rayber Apoyî pêşwazî bikerê û fîraz bikerê.

Eke ma mesajê telefonî yê Rayber Apoyî hol biercnê ganî ma nê wextî bikerê wextê xoverdayîşî û serkewtişî. Bi nê hawayî embaz û yewînê têgêrayîşê eşkenê Hemleya 'Wextê Azadîye yo' bikerê bingeyê rayraşîyayîşê azadkerdişê Rayber Apoyî û Kurdîstanî. Tewr peyên Garê de ma no tewirê xoverdayîşî mojna. Ma do nê wextî bikerê serkewtişê tarîxî. Pê na qerardarî û vîrî ma pêro embazan selam kenê û pêro embazan rê serkewtiş wazenê.''