Fermandarîya Qerargehê Merkezê Pawitişê Şarî (MPŞ) derheqê şehadetê Huseyîn Acarî (Dilşêr Herekol) de eşkerayîyêke daye.

Eşkerayîye wina ya:

''18-19ê teşrîna verêne ya 2020î de artêşa tirke ya îşxalkere Dortyolê Hatayî de operasyonêk da destpêkerdene. Qetî yo ke nê operasyonî de Fermandarê ma Dilşêr Herekol (Huseyîn Acar) şehîd bi ke embaz Dilşêr Herekol fermandarê xoverdayîşê vera qirkerdişê Şingalî bi.Ma sere de keyeyê ercîyayeyî yê embaz Dilşêrî rê, şarê xoverdayoxî yê Şingal û Botanî rê û pêro şarê welatperwerî yê Kurdîstanî rê serweşîye wazenê. Ma reyna şexsê embaz Derwêşê modernî û fermandarê bêmergî Dilşêr Herekolî de soz danê ke ma do armancanê şehîdanê xo bîyarê ca û dewaya xo ya azadîye bivisnê ser.

Nameyê Qodî: Dilşêr Herekol Name û Peyname: Huseyîn Acar Cayê Bîyayîşî: Dihê Maye-Pî: Emîne-Abdullah Tarîx û Cayê Şehadetî: 19'ê Teşrîna Verêna 2020î / Amanos

Embaz Dilşêr dewa Torikî ya qezaya Dihî ya Sêrtî de dadîya xo ra bîyo. O pê hîkayeyanê çêrîye yê Fermandar Agîtî pîl bi û pê kulturê welatperwerîye yê Botanî weye bi. Dewleta tirke ya faşîste dewa Torikî rê qoricîtî ferz kerde û 1994 de dewe kerde veng. Coka keyeyê embaz Dilşêrî koçê metropolanê Tirkîya kerd. Embaz Dilşêro ke bîyo şahîdê kerdişan ê faşîstan ê dewlete serra 1997î de tewrê gerîlayan bi.

Embaz Dilşêr Amanosan de dest pê têkoşînî kerd û bi gerîlayêko bihuner. O prosesê apeyagêrayîşî yê 1999î de hetê rejîmê Sûrîye ra esîr ame girewtene, 3 serran zîndan de mend. 2002 de wexto ke o zîndanê Sûrîye ra vejîya reyna ver bi koyan ame. Embaz Dilşêr Herêmanê Pawitişî yê Medya de serrêke mend û 2003 de derbazê Gabarî bi. Embaz Dilşêr Hemleya 1ê Hezîrana 2004î de Gabar de rolêko pîl girewt xo mil, 2005 de derbazê Zapî bi, 2007 de zî derbazê Botanî bi.  Ey mîyanê zor u zehmetîyanê Gabar û Besta de têkoşîn kerd, rayberîya xeylêk çalakîyanê Botanî kerde, sey weste dafikan ra xo xelisna, 2 reyî bi giranî birîndar bi la qet têkoşînî ra fek vera nêda. O Botan de rêçê Fermandar Agîdî ser o bi fermandarêkê gerîlayan. Serra 2012 de embaz Dilşêr seba ke tecrube û hunerê xo pê rayîrê perwerde gerîlayan reyde pare bikero derbazê Herêmanê Pawitişî yê medya bi. Ey serra 2013-2014î de kedêka pîle daye perwerdeyê gerîlayan û koordînator û fermandarîya çalakîyan kerde.

DAÎŞo ke hetê dewleta tirke ra vera kurdan şuxilîya 2014 de wehşetê pîlî kerdî. Partîya ma PKK zaf rew pê tehlukeyê qirkerdişê kurd û êzidîyan hesîya û koma verêne ya 12 gerîlayan erşawite Şingal ke nê 12 gerîlayî sey 'Derwêşê modernî yê suwarî' şinasîyenê. Na kome şîye Mûsil û rixmê astengîyan resaye şarê Şingalî. Nê 12 gerîlayan rîyê ma sîya nêkerd û verê qirkerdişêkê pîlî girewt. Embaz Dilşêr Herekol fermandar û berpirsîyarê nê gerîlayan bibi. Embaz Dilşêrî şarê Şingalî hîşyar, rêxistin kerde û seba ke verê tehlukeyî bigêro xîret kerd. Sayê embaz Dilşêr û 11 gerîlayan de wexto ke DAÎŞ resa Şingal verê qirkerdişî amebi girewtene. Nê embazanê ma şingalijî resnabî koyanê Şingalî.

Embaz Dilşêrî koyanê Şingalî de ewladê êzidîyî rêxistin kerdî û bingeyê Yewînanê Xoverdayîşê Şingalî (YBŞ) eşt. YBŞyî rayberîya embaz Derwêşî de tewirêk mojna. Mudaxeleyê tarîxî yê gerîlayanê HPG û YJA Starî û paştdayîşê YPGyî ra dima hemleya azadîya Şingalî dest pêkerde û Şingal faşîzmê DAÎŞî ra ame xelisnayene. Embaz Dilşêrî pê fedakarî, çêrî, şerwanî û fermandarîya xo  Şingal de partîkêko serkewte mojna û zerrîya pêro şarê Şingalî de bi wayîrê cayêkê ercîyayeyî.  Xeylêk ciwanî pê tesîrê ey tewrê têkoşînî bîyî, şingalijan nameyê domananê xo kerd Dilşêr.

Embaz Dilşêr dima ke xopawitişê Şingalî teslîmê ewladanê YBŞyî kerd Şingalî ra vejîya û 2016 de agêra Herêmanê Pawitişî yê Medya. Embaz Dilşêrî tim bale antêne ser ke paştdayox û hemkarê DAÎŞî dewleta tirke ya. Coka seba ke faşîzmê dewleta tirke biqedîno ey waşt ke abigêro Amanosan. Nê esasî ser o ey reyna Amanosan de dest pê fermandarîye kerd.

Embaz Dilşêr fermandarêko çêr o Apogîr bi ke tede hunerê koordîne, hîşmendîya şorişgêrîye û feraseto berz estbi. Fedakarî, çêrî, têkoşîn, samîmîyet, durustî û perwerîya ey ma pêroyînan rê mîsalêk o. Ey 23 serran de mîsalê milîtanî û fermandarîtîya Apogîrîye mojna. Ma pê sereberz ê ke ma hetê Derwêşanê modernan ê sey embaz Dilşêrî de rayîrê têkoşînî ra şonê.

Sere de şarê Botan û êzidîyan pêro kurdî çend pê embaz Dilşêr sereberz bibê heqê înan o. Heta ke Derwêş, Egîd û Dilşêrî bibê têkoşînê azadîye yê kurdan dewam bikero û adirê azadîye koyanê Kurdîstanî de qet hewna nêşoro. Çunke Rayber Apoyî mujdeyê ci dabi ke merg kamca ra yeno wa bêro xem do ser nêkewo, cuya azade û kurdayetîye raştîyê qetî yê. Ma zî xîret kenê ke bibê embazê raştikênî yê Apogîranê raştikênan, rayîrê şehîdan ra şorê. Ma soz danê ke ma do pê gerîlatîya Apogîre ser bikewê û dewaya xo ya azadîye pê serkewtişî tacîdar bikerê.''