Fermandarîya Qerargehî ya Merkezê Pawitişê Şarî (MPŞ) bi wesîleya Roşanê Newroze eşkerayîyêke daye. Eşkerayîye wina ya:

''Newroza ke nameyê yewî û serfîrazîya şaran a, seba kurdan nameyê serewedaritişê vera zulmê Dehaqî û girkerdişê adirê Kawayê asînkarî yo. Têkoşînê  50 serran ê Rayber Apoyî, xoverdayîşê bêhempayî yê artêşa ma ya bi şehîdan rayberîya Mazlûm Doganan de û têkoşînê 40 serran ê PKKyî şarê kurd o newrozbîyaye aferna. Ma şexsê Mazlûm Korkmazî û Mazlûm Doganî de pêro şehîdanê xo bi minet û rêzdarî yad kenê. Ma Newroza pêro şarê xo, dostanê xo, keyeyanê şehîdan ê ercîyayeyan, yê pêro şaran fîraz kenê. Ma soz danê ke ma do rayîrê têkoşînî yê şehîdan de şorê û adirê Newroze pê serfîrazî tacîdar bikerê.

Ma sey şar û têgêrayîş Newroza 2021î pê ruhê destanê Garê û Hemleya Wextê Azadîye pêşwazî kenê. Embazanê ma yê çêran Garê de ke tede adirê Newroze ame tavistene, rayberîya embaz Şoreş Beytuşşebabî de xoverdayîşêko tarîxî kerd, destanêko pîl nuşt û mojna ke ê teqîbkerdoxê Mazlûm Doganan û Kawayan ê.  Ruhê serkewtişî yê nê çêranê ma na Newroza newîye de moralêko pîl da şarê ma û dostanê ma û mojna ke gerîlayê azadîye yê Kurdîstanî mîyanê pêro şert û mercan wayîrê ê hêzî yê ke pê serkewtişan biafernê.

Ma sey gerîlayanê azadîye yê Kurdîstanî pê mesuldarîya rayberîya şerê şarî yê şorişgêro ke seba caardişê azadîya Rayberîye û  Kurdîstanî tek rayîr o, dekewenê na serra newîye ya Newroze. Konseya Fermandarîye ya MPŞyî menganê zimistanî de kombîyayîşê xo kerdî,  taktîkê xo net kerdî, plansazîya xo qetî kerde û pê qerardarîyêka pîle bi hawayêkê amade dest pê serra newîye kerd. Esasê nê amadekarîyan de şehîdanê ma yê çêranê ke Garê de artêşa dişmenî bin kerde bi hawayêkê zelalî mojna ke serra newîye ya têkoşînî do senî biqewimîya.

Esasê felsefeya Apogîre de û xeta fedayîya şehîdanê PKKyî de ma sey Hêzanê Pawitişê Şarî yê Kurdîstanî heta ke rayraşîyayîşê Kurdîstanê azadî û Rayberîya azade pê serkewtişî tacîdar bikerê bi qerardarî do têkoşîn bikerê. Şaro ke pê ruhê serewedaritişî hêrîkîyeno waranê Newroze ma koyanê azadan ra ê selam kenê. Ma reyna pê ruhê fedayî yê Apogîrî Roşanê Newroze fîraz kenê û pêro hêzanê azadîye rê têkoşînê înan de serkewtiş wazenê.''