Dewleta tirke ya îşxalkere vera gerîlayan çeka kîmyewîye xebitnena û sûcanê şerî kena. Fermandarîya Qerargehê Merkezê Pawitişê Şarî derheqê babete de eşkerayîyêke daye.

Eşkerayîye wina ya:

''Şerê dewleta tirke ya îşxalkere de ke serkêşîya rejîmê AKP-MHPyî de Kurdîstan de yeno kerdene qanûnanê mîyanneteweyîyan binpay keno, heqanê merdiman çin hesibneno û sûcanê şerî keno. Hêzê Azadîye yê Kurdîstanî yê ke têna heqanê xo yê meşrûyan wazenê pê vateyê 'terorîstî' yenê pênasekerdene, vera şarê ma û hêzanê ma yê têkoşînî rayîr û metodê terorê dewlete yenê caardene. Dewleta tirka ke Kurdîstan de sîyasetê qirkerî kena, Îmrali de tecrîd ana ca, qanûnanê neteweyîyan û mîyanneteweyîyan binpay kena.

Bi heman hewayî rixmo ke dewlete vera Gerîlayanê Azadîye çekanê teknolojîya moderne xebitnena nêeşkaye îradeyê gerîlayan bifatisna coka teng bîya. Rejîmê AKP-MHPyî yo faşîst çekanê kîmyewîyan ê qedexekerdeyan xebitneno û wina wazeno ser bikewo.

Operasyonê vera herêma Garê ya Başûrî yê 10-14ê sibata 2021î de eşkera bi ke înan çeka kîmyewîye xebitnaye. Operasyonê îşxalî û hêrişê bi nameyê Pençe-Şîmşek û Pençe-Yildirimî yê vera herêmanê Avaşîn, Zap û Metîna 159 rojî peyê xo de verdayî. Nê herêman de 159 rojî yo bêmabên şer yeno kerdene. Dewlete û çapemenîya tirkan na raştîye rayaumûmîye ra nimnenê. Nê şerî de hêzanê artêşa tirke ya îşxalkere xeylêk reyî gazê kîmyewî xebitnayî. Sere de warê Zendûra yê Metîna û warê Girê Sorî yê Avaşînî de xeylêk herêman de çeka kîmyewîye şuxilîyaye. Na raştîyêka eşkera ya. Nika zî semedê şiknayîşê xoverdayîşê xeta Werxelê her roje bi giranî bombayê kîmyewî yê cîyayî şuxilîyenê.

Bêguman no binpaykerdişê qanûnanê şerî yê mîyanneteweyîyan o, kerdişê vera merdimîye yo û sûcê şerî yo. La Amerîka û Yewîya Ewropa yê ke partîya ma PKK kerde lîsteya terorî  hemparîya nê sûcê şerî kenê. Welatê NATOyî hemparê nê sûcî yê. Artêşa tirke bi taybetî 15 rojanê peyênan de bombayê kîmyewî şuxilnayî. Eşkera yo ke no tewro newe yê bombaya kîmyewîye hetê nê dewletan ra dîyayo. Êyê ke nê pêroyînan kenê û hêzê ke bêveng manenê û hêzî danê rejîmê AKP-MHPyî ke kurdan qir bikero şirîkê nê sucê merdimîye yê.

Şarê kurdî şaranê tewr qedîman ê na cografya ra yo. Nê erdî de pawitişê heqê cuye yê bi kulturê xo û bi hawayêkê azadî ra ber çîyêk nêwazeno. Têna paştî mede nê polîtîkayanê qirker û nîjadperestab ê dewleta tirke ke vera şarê ma û hêzanê ma yê azadîye kena. Mebê hemparê sûcê vera merdimîye! Erjanê berzan ê nê dewrî binpay mekerê, peyê nê sûcan de mevinderê ke pê fermanê rejîmê Erdogan-Bahçelîyî yê faşîstî yenê kerdene û çeka kîmyewîye şuxilîyena. Mebê hemparê binpaykerdişê erjanê merdimîye.

Sere de Neteweyê Yewbîyayeyî ma venga dezgehanê mîyanneteweyîyan, hêzanê demokrasî yê mîyanneteweyîyan, dezgehanê sivîlan û pawitoxanê heqanê merdiman danê ke vera dewleta tirke wirzê payan ser, binpaykerdişê qanûnanê şerî û huqûqê mîyanneteweyî rê vajê bes o.

Semedê ameyoxê demokratîke û azade yê şarê kurdî şaranê herême Gerîlayî Apogîrî bi fedakarî ganê xo feda kenê, vera faşîzmî xoverdayîşêkê tewr şorişgêrî kenê û rejîmê AKP-MHPyî yê qirkerî çin kenê. Vera şuxilîyayîşê çeka kîmyewîye yê AKP-MHPyî ganî kes bêveng nêmano. Mîyanê nê têkoşînî de ma do pê qerardarîyêka pîke, bedelê ci çi beno wa bibo xo ver bidê û serkewtişî xo rê esas bikerê. Nê xoverdayîşî de heta nika bedelê pîlî dîyayî, şehadetî qewimîyayî, zîyanî virazîyayî. Eke nêno waştene ke bombardumananê kîmyewîyan de vînîbîyayîşê giranî biqewimîyê ganî şarê ma cade têbigêro. Pêro Kurdîstan de ganî şarê ma hêzê xo yê mkomelkî bimojno, vera nê metodanê şerî yê vera merdimîye nêrazîbîyayîşê xo eşkera bikero. Sere de dezgehê demokratîkî ciwanî, cinîyî û welatperwerê ma yê kedkarî, hêzê demokrasî yê Tirkîya û herême ganî na babete de wezîfeyê xo bîyarê ca.

Ma venga şarê ma, ciwanan, cinîyan, şar û dostanê enternasyonalan danê ke wezîfeyo tewr demokratîk o ke verê dezgehanê mîyanneteweyîyan de sûcê înan ê hemkarîye bêrê deşîfrekerdene û rayaumumîye bêra agahdarkerdene.

Na safahaya girînge ya tarîxî de oxirê dewaya xo ya azadîye ya fîraze de ma bi hawayêkê fedayî û çêrî şer kenê, rayîrê azadî û demokrasî akenê. Rejîmo faşîst vera ma bi hawayêkê namerdî bombayanê kîmyewîyan xebitneno û xîret keno ke verê binkewtişê xo bigêro. Rejîmo faşîst pê nê pratîkê xo vera erjanê merdimîye sûc keno. Senî de wextê Terteleyê Dêrsimî yê 1938î de selahîyetdarêkê dewlete vat 'Ma jehrê mareyan eşt zereyê şikefteyan û pêroyî kiştî' ewro zî dewlete pê heman metodî têgêrena û kena.

Seserra 21. de rejîmê tirkan o kolonyalîst pê binpaykerdişê qanûnan ê neteweyîyan û mîyanneteweyîyan sûc keno. Vera ney ma venga dezgehanê demokratîkan ê mîyanneteweyîyan û neteweyîyan, pawitoxanê heqanê merdiman danê ke erk û mesuldarîyanê xo bîyarê ca. Vera nê kerdişan her kes û hêzê wayîrqijdanî wa wayîrê qanûnanê mîyanneteweyîyan vejîyê, wezîfeyanê xo yê merdimîye, exlaqî û wijdanîyan bikerê.''