Fermandarîya Qerargehê Merkezê Pawitişê Şarî bi wesîleya menga şehîdan seba pêro hêzanê gerîlayan mesajêk weşana.

Mesajê fermandarîye bi kilmî wina yo:

''Gulane menga şehîdan a, 18ê Gulane roja şehîdan a. Ma şexsê şehîdê ma yê verênî Hakî Karerî de û şexsê Halil Çavgun, Ferhat Kurtay, Mehmet Karasungur, Şîrîn Elemhûlî, Ozan Mizgîn, Azad Sîser û Çekdar Amedî de pêro şehîdanê xo bi rêzdarî yad kenê. Ma soz danê ke armancanê înan bîyarê ca, teqîbkerdoxê înan bibê û vîrameyîşê înan bi têkoşînê azadîye bidê ciwîyayene.

Menga gulane seba Têgêrayîşê Şorişgêrî yê Tirkîya û şarê erebî zî mengêka girîng a. Ma şehîdanê înan zî bi rêzdarî yad kenê.

Kurdîstan de têkoşîn rehet nêbi; welatê ma û şarê ma ameyêne înkarkerdene, sîyasetê qirkerdişî ameyêne kerdene. Têkoşînê azadîye bi keda şehîdan û bingeyê xoverdayîşî de ame kerdene. Kurdîstan de şarê ma estbîyayîşê xo bi ked û xoverdayîşê şehîdan girewt binê garantî. Ewro şehîdî çimeyê ma yê hêzî yê. Perwerîya bi şehîdan perwerîyêka tewr fîraz a. Perwerîya ma ya bi Rayberîye û şarê ma zî esasê perwerîya bi şehîdan de xorin bena. Sozo ke ma dabi şehîdan, ma rê sozê rûmet û şerefî yo. Ma do qetî nê sozî ra fek vera medê. Ma zanenê ke ma pê serfîrazî û serkewtişî nê sozî bîyarê ca.

Şehîdanê ma tarîxê têkoşînî de rolê pîlî ardî ca. Ewro zî ma mîyan de şehadetî benê. Mengêke ra nata Zap û Avaşîn de vera teknolojîya moderne û barbarîya dewleta tirke xoverdayîşêko tarîxî û şerêko pîl est o. Ma şehîdanê nê xoverdayîşî bi rêzdarî yad kenê. Înan pê xoverdayîşê xo bingeyê rijîyayîşê rejîmê faşîstî awan kerd.

Xoverdayîşê Zapî xoverdayîşêko normal nîyo tarîxî yo. No şer şerê mendiş û mergî yo. Dewleta tirke 7 serrî verî dima ke Mutabeqatê Dolmabahçe rijna bi konseptêkî vera Raybrîye,, Têgêrayîşê ma û şarê ma hêrişê topyekunî dayî destpêkerdene. Rayber Apoyî 24 serrî yo tewirê xo yê xoverdayîşî nêvurna û Îmrali de vera pêro îşkence û kerdişanê xiraban zî apey gamêke nêeşte. Şarê ma zî gerîlayan reyde bi her hawayî maruzê hêrişanê dewlete beno.

Dewleta tirke prosesê nê şerî de hêrişê Rojawan û Şingalî zî kena. Şarê Şingal û Rojawanî vera ney xoverdayîşêkê rûmetînî kenê û cewabo raştikên da dişmenî. Nê 7 serran de xoverdayîşê gerîlayan nêverda ke faşîzmê dewleta tirke, îqtîdarê AKP-MHPyî û Ergenekonî ser bikewo. Ne Şingal, ne Rojawan, ne Vakur ne zî Başûr de planê înan raşt nêbîyî. No hukmatê AKP-MHPyî û Ergenekonî armanc keno ke Rojawan û Başûrî îşxal bikero, Iraq û Sûrîye bigêro binê kontrolê xo. NATOyî zî paştî daye ney û tekonolojîya çekan û teyarayê keşfî dayî dewleta tirke.

No rejîmo faşîst ho peynî de yo, serrêka înan menda. Tirkîya de krîzo ekonomîk o pîl est o. Erdogan wazeno pê firsendê şerê Ukrayna-Rûsya, pê hemkarîya PDKyî, pê qoricîyan û pê cerganê DAÎŞ û EL Nûsra emser cade netîce bigêro. Coka dewleta tirke 17ê nîsane de hêrişê Zapî kerd. Têna Herêmê Pawitişî yê Medya nê pêro Başûr, Mexmûr, Şingal û Rojawan hedefê nê planî yê.

Şerê Zapî zaf muhîm o çunke eke hesabê înan nêtepişê do bin bikewê. Eke ma înan bin bivisnê rejimo faşîst do birijo. Dişmen heta nika cayêk de ser nêkewto. Şerê Zapî lewe yo. Îmkanê ma est ê ke ma nê şerî de ser bikewê. Çunke ma heqdar ê. Rayîrê ma rayîrê Rayber Apoyî yo. Perspektîfê ma yê Şerê Şarî yê Şorişgêrî eşkeno ma biresno serfîrazîye, tecrubeyê ma yê pîlî est ê. Şerê Şarî yo Şorişgêr şerê gerîlayan, şar û xopawitişî yo. Ma têna serê erdî de ney binê erdî de zî şerî aver berê. Dişmen xo rê madîyat esas gêno. La ma xo rê manewîyat esas gênê. Ma pê îradeyê xo do heqê teknîkê dişmenî ra bêrê.

Înan seba ke bi lezî netîce bigêrê pêser hêrişê Werxelê, Kuro Jahro, Şehîd Şahîn û Şehîd Berxwedanî kerd. Înan nameyê operasyonî kerd 'Pençe--Kîlît' la Zap de kilîd bîyî, nêeşkenê têbigêrê. Nika dişmen wazeno bi hetkarîya PDKyî rayîrê gerîlayan bigêro, dafikan rono û eyalatanê ma bisivno war. Stratejîya dişmenî wina ya. Na çarçewe de embazanê ma Cûdî de tay çalakîyî kerdî, Yewinanê Qesasî yê Şehîd Bedranî tay çalakîyî kerdî, HRE zî tay çalakîyî kerdî. Ma nê çalakîyan selam kenê. Ganî pêro kurdîstanijî vera dişmenî tewir bigêrê û pê îmkananê xo, metodanê xoverdayîşî aver berê.

Vakurê Kurdîstanî nê prosesî ra dima beno ke hîna aktîf bibo.Embazanê ma yê Vakurî çalakîyê girîngî kerdî û prosesê zimistanî de firsend nêda dişmenî. Marînos de derbe dîyaye dişmenî. Gerîlayê Vakurî kewtî dewrêkê neweyî. Gerîlayî emser têna zimistan de nê wisar de zî serkewte yê.

Bêguman xoverdayîşê Zapî serkêşê nê prosesî yo. Pêro eyalet û warî wa Zapî têna meverdê. Ewro xoverdayîşê Zapî û dormeyê nê xoverdayîşî de şorişê ma xoverdayîşêko neteweyî û demokratîk o. No xoverdayîş xoverdayîşê ameyoxê şarê kurdî û şaranê herême yo. Dewlete reyna wazena erdê xo pê îşxalê Kurdîstanî hîra bikera, pêro kurdan qir bikera. Coka xoverdayîşê Zapî hende girîng o. Wa verî embazê ke Zap de yê ney ra hayîdar bê. Pêro şorişgêrê Kurdîstanî nê prosesî de wa bi mesuldarî têbigêrê.

Rewşa Zapî heta nika hol a. Embazanê ma heta nika cewabo qîm da dişmenî. 33 rojî vîyartî la hema zî dişmenî çîyêk nêvist destî. Dewlete pê zûran kena ke xo serkewte nîşan bida. Rixmo ke 400 ra zêdêr kişteyê înan est ê têna 10ê ci eşkera kerdê. Dişmenî armanc kerdêne ke mîyanê 3 hewteyan de Zapî bivisno destî û derbazê Metîna bibo. La heta nika ê nêeşkayî Zapî deerbaz bikerê. Nika fam bîyo ke destê dişmenî de hende îmkanî çin ê. Destê înan de têna çekê kîmyewî mendî. La pê nê çekan ê do nêeşkê ser bikewê. Ganî embazê ma afernayoxîye xorin bikerê, pê eqlê xo têbigêrê û karê plankerdeyî bikerê. Wa embazê ma ruhê embazîye aver berê û yewbînan temam bikerê. Dişmen bi nê hawayî do bin bikewo.

Nika nê prosesê tarîxîyî de embazê ma hê serê sehne de yê. Ewro çimê şarê kurdî, demokratan û dostanê ma hê Zap de yê. Wa her kes wayîrê mesuldarîya xo vejîyo, meverdo ke dişmen kêmasîyanê ma ra îstîfade bikero. Embazê ma eke hewce bibo wa bibê fermandar. Eke ma wina têbigêrê do ser bikewê û tarîxî newe ra binusê. Pawitişê ma pawitişêko aktîf o. Yanî hêrişkerdiş o. Embazê ma yê tunelanê şerî bi nê metodî wa têbigêrê. Wa tîmê hereketînî bi nimitkî têbigêrê. Embazî wa pê çalakîyanê suîkast, derbkerdiş, sabotaj, dafike û mîyandekewtişî derban bidê dişmenî ro. Wa embazî dişmenî hende qij mevînê û tim tedbîranê xo bigêrê.

Ganî ma şarî biancê nê şerî ser. Wa embazê ma bi rayîrê çapemenîye qisey bikerê û qala nê şerî bikerê. No şer têna Zap de nîyo pêro Kurdîstan de yo. Ganî ma şerê psîkolojîkî yê dişmenî pê rayîrê propagandaya yanî çapemenîye pûç bikerê. Wa embazê ma verê çapemenîye de raştîyan vajê. Xoverdayîşê vera dişmenê winasênî rehet nîyo, wa şarê ma pê naye bêro hesnayene.

Gerîlayî hêzê serkêşî yê. Wa şar wayîrê gerîlayan nê wayîrê erkanê xo yê welatperwerîye vejîyo. Çarçewa Şerê Şarî yê Şorişgêrî de wa şar û gerîlayî erkanê xo bikerê. 2022 serrêka stratejîk a. Ma coka emser seferberîye îlan kerde. Ma pê bawer ê ke sere de cinî û ciwanî pêro kurdîstanijî na seferberîye de do erkanê xo bîyarê ca.''