Namzedê hemşaredarîyê HDP’yî yê Mûşî Sîbel Gençe û Sirri Sakik, buroyê weçînitişî yê merkezî de ciwanan reyde ameyî têhet û goştarîya persanê înan kerde. HDP’yîyan ard ziwan ke, weçînitişê 31’ê Adare de cewabo tewr gird do ciwanî bidê.
Parlamenterê HDP’yî yê Muşî Mensur Işık, namzedê hemşaredarîyê HDP’yî yê Mûşî Sîbel Gençe û Sirri Sakik, îdarekerê HDP’yî yê bajarê Mûşî, buroyê weçînitişî yê merkezî de wendekaranê Unîversîteya Alparslanî ya Mûşî û ciwanan reyde ameyî têhet.
MA DO PÎYA ÎDARÊ BIKERÊ
Namzeda hemşaredarîya HDP’yî ya Mûşî Sîbel Gençe bale ante serê dînamîzmê ciwanan û ard ziwan ke wayîrê ameyoxî ciwan ê û wina dewam kerd, “Ma seba ciwanan ê ke ameyoxê ma yê çi ma dest ra bêro ma do bikerê. Ma ke weçînitiş de şaredarîye girewte, ma projeyê ke ciwanan eleqedar kenê hemeyan înan ra do bipersê û wina bikerê. Ma do pîya şaredarîye îdare bikerê.”
Namzedê hemşaredarîya HDP’yî yê Mûşî Sirri Sakikî zî vat, “Seba ke ciwanî hîna baş biciwîyê çi ma dest ra bêro ma do bikerê. Çunke heme amancê ma ciwîyayîşêka hîna newe ya. No zî seba şima yo. Ma do pîya roja 31’ê Adare de tarîx binusê.
WEÇÎNITIŞÊ 31’Ê ADARE DE CEWABO TEWR GIRD DO CIWANÎ BIDÊ
Parlamenterê HDP’yî yê Mûşî Mensur Işıkî ard ziwan ke her çî de tim rolê ciwanan muhîm o û vat, “Tarîx de heme têkoşînan rê rayberîye ciwanan kerda. No semed ra 31’ê Adare de cewabo tewr gird do ciwanî bidê.”
CIWANAN PERSAYÎ, NAMZEDAN CEWABÎ DAYÎ
Qiseykerdişan ra dima ciwanan parlamenter û namzedan ra persî pers kerdî û fikir û pêşnîyazê xo înan reyde pare kerdî. Wexto ke ciwanî buroyê weçînitişî ra vejîyayî polîsan waşt ke sehnayîşê zanayîş ê pêroyîyî (GBT) bikerê. Sakikî, polîsan de qisey kerd û înan vat, nê caardişî zext ê û wina kerdişê înan zerar danê têhetciwîyayîşî û nê caardişan ra fek raverdê. Dimayê GBT’yî ciwanî vila bîyî.
