Meclîsê Xoserîya Demokratîke ya Şingalî (MXDŞ) bi wesîleya serrgêra 3. ya xoapeyantişê gerîlayanê HPG û YJA-Starî eşkerayîyêke daye.

Destpêkerdişê eşkerayîye de şexsê fermandaranê HPGyî ra şehîd Egîd Cîvyan û şehîd Dilşer Herekolî de heme şehîdê ke semedê xelisnayîşê Şingalî ganê xo da ameyî vîrardene.

Meclîsî da zanayene ke Fermanê 3ê Tebaxa 2014î de pêşmergeyî û hêzê Iraqî Şingalî ra remayî la gerîlayê HPG-YJA-Starî vazdayî hewarê êzidîyan. Meclîsî vist vîrî ke xelisnayîşê êzidîyan ra dima hêzanê gerîlayan binê çimdarîya Iraqî de 1ê nîsana 2018î de xo Şingalî ra apey ant û mojna ke ê têna xelisnayîşê Şingalî ameybî.

Eşkerayîye wina dewam kena: ''Êzidîyan pê perwerdeyê gerîlayan rêxistinîya xo awan kerde ke na rêxistine zorê dewleta tirke şîye. PDK wazeno êzidîyan yewbînî ra dûrî bifîno û newe ra Şingal bivisno destê xo. PDK û Iraq pê peymana 9ê teşrîna peyêne wazenê ferman newe bikerê.

1ê nîsane seba ma rojêke manadar a. Coka Iraq seba tasfîyeya Îdareyê Xoserî û hêzanê ma heta 1ê nîsane wext da ma. Ê waştişê Tirkîya ser o na roje bikerê tasfîyeya rêxistinîya êzidîyan. Ma sey komelê êzidîyan wayîrê birêka zelal ê. Xoverdayîş û pawitişê destkewteyan û şarê xo ra berî ma rayîrêkê bînî qebul nêkenê.''