Mamreşo cepheyo tewr zehmet ê Hemleya Şorişgêre ya Bazanê Zagrosî yo. Girê Şehîd Munzurî yê Mamreşoyî de 7 gerîlayan pêro tunel û mewzîyanê şerî de vera teknîk, leşkeran û gazanê kîmyewîyan ê artêşa îşxalkere xo ver da. Fermandarê nê gerîlayanê ke 10 rojî bêteredut mewzîyê xo pawitî Serhat Giravî (Kamuran Alpsar) bi.

Serhat Giravî 1989 de Colemêrg de dadîya xo ra bi û o serra 2011î de tewrê gerîlayan bi. Pêro cuya gerîlatîye ya ey hema hema tim Zagrosan de vîyarte. Nê serran de ey bi taybetî Avaşîn de tim vernîya cepheyî de cagirewt. O Zagrosan de gerîlatîye musa, derbê giranî dayî dişmenî ro û bi fermandar. Fermandar Serhat sey Zagrosan serewdarox û xoverdayox bi û her guleyê xo de zêder bi Zagros. Zagrosî zî tim o kerd verarê xo.

Wexto ke artêşa tirke ya îşxalkere 23ê nîsana 2021î de Avaşîn de dest pê operasyonî kerd Serhat Giravî sey fermandarê herême warê Mamreşoyî de wezîfedar bi. Key artêşa îşxalkerî Mamreşo de leşkerê xo ardî war Serhatî cîhazî rê hêzanê gerîlayan rê wina vat: ''Mamreşo do dişmenî rê bibo gor.'' Na qerardarîya Serhatî netîceya operasyonî eşkera kerde. Serhatî hetêkî ra şerê tunelan koordîne kerdêne hetêkê bînî ra zî moral dayêne hêzanê gerîlayan. Şerê des rojan ê Mamreşoyî nîşaneya ruhê fermandar Serhat û gerîlayan Sarya Dîya, Rûkene Zagros, Canfeda Hesekê, Zafer Tolhildan û Xebat Asoyî û îradeyê Apogîrîye bi.

Artêşa tirke vera nê xoverdayîşî bêçare mende. Artêşa îşxalkere beno ke reya verêne metodê nêşuxilîyayeyî seba ke ê gerîlayan teslîm bigêra şuxilnayî la ser nêkewte. Artêşa tirke sûcê merdimîye kerd û vera nê binkewtişê xo gazê kîmyewîyî şuxilnayî. Netîceya xoverdayîşê 10 rojan de Mamreşoyî de Fermandar Serhat û embazanê ci pê qîrayîşî na raştîye resnaye pêro dinya: ''Ma şerwanê Şehîd Serdarî yê, Zagrosan de îşxalkeran rê rayîr çin o!''