Qezaya Farqînî  ya Amedî ke tarîx de zaf kultur û qewimîyayîşê muhîman rê şahîdê kerda, rojdemê weçînitişê cayayîyan a. Partîya Herêmanê Demokratîkan (BDP) a ke xeta partîyanê sîyasîyan ê Kurdî ra yena, weçînitişê cayayîyan ê 2014’î de qezaye de se ra 70 reyê şaredarîye girewte. Qeyûmo ke serra 2016 de ame tayînkerdene, banê şaredarîye kerd sey qereqol û şarî ra visnaye. Qeyûmî çî-mîyê şarîdarîyê ke nênê antene hemeyî dayî kesanê ke nêzdîyê AKP’yî yê û şaredarîye kerde deyndare. HDP’yî seba şaredarîya ke şarî ra ameya girewtene, weçînitişê 31’a Adare de Naşîde Toprake û Abbas Azîzogluyî namzedê serekeyî mojnayî.

Namzedê hemserekanê Şaredarîya Farqînî ra Abbas Azîzogluyî ard ziwan ke şaredarîya ke ameya xaspkerdene ê do apey bigêrê û vat, “Pereyê ke bi heme bacê şarî ameye dayene, çi heyf ke nê pêroyî kewtê bi cebanê kesanê ke nêzdîye rejîmê AKP-MHP’yî yê. Heme projeyê ma îptal kerdê. Xebatkarê ke wextê ma de xebitîyayêne hem îxraç kerdî û hem zî teber ra newe ra kesî ardî. No semed ra şarê ma rê hema-hema qet xizmet çin o. Peşkêşkerdişê pereyê pêroyîye ra teber qet xizmetê ci çin ê.”

Naşîde Toprake zî da zanayene ke karê qeyûman o tewr verên padayîşê sazgehanê cinîyan bi û qeyûman verê heme xebatê wareyê kultur û ciwanîye girewtê û vat, ê dimayê destê qeyûman ra şaredarîye giretişî karê înan o verên akerdişê sazgehanê cinîyan, ciwanan û kulturî, yê  ke hetê qeyûmî ra ameyê padayene. Ma cayanê tarîxîyan do restorasyon bikera. Ma tarîxê Farqînî dinya ra do bida naskerdene. Ma do pîya astengan biwedarê û şaredarîye gemarê qeyûmî ra pak bikerê. Şaredarîye şarî reyde ma îdare bikerê”