Namzedanê hemserekîya şaredarîya  HDP’yî yê Gimgimî  Ulku Karaaslane û Mahmut Yalçinî ard ziwanê ke ê do 31'ê Adere de şaredarîye qeyûmî ra pak bikerê.

Gimgim bi kultur û cuya xo, herême de cayêko taybet o. Weçînayîşê herêmîyî yê serra 2014’î de DBP’yî se ra 63.4 reyî girewtîbî, la 11’e Teşrîna Peyêne 2016’î  de qeyûm tayînê şaredarîye bi û 2 serran ra zêderîyo ke Gimgim bi qeyûmî yeno îdarekerdene. Weçînayîşê 24’ê Hezîrane 2018’î de zî HDP’yî Gimgim de se ra 83.2 reyî girewtî û peyamê ‘Ti do şorî’ dabi qeyûmî. Namzedê şaredarîya Gimgimî yê HDP’yî Ulku Karaaslane û Mahmut Yalçin, xebatanê weçînayîşî bi hawayêko berz domnenê û vanê ma do bi ferqê pîlî bibê serkewte.

QEYÛM RANT O

Ulku Karaaslane vana armancê înan o yo ke şaredarîye destê qeyûmî ra bigîrê û teslîmê şarî bikê. Karaaslane va wextê qeyûmî de qet yew xebat nêameyo kerdene û wina dewam kerd: ”Gimgim bi ziwan,bawerî û kulturê xo cayêko dewlemend o. Ma do goreyê nê esasan xizmete bikê. Ma xeylî kêmasîyê Gimgimî tespit kerdî. Ma do şarê xo reyde nê kêmasîyan çareser bikê. Sey nimûne; dewan ra cinîyî ke ameyî merkez, ca çin o ke tede ronîşê. No problemo zaf pîl o û ma do çareser bikê. Ma şaredarîye yew kesî ra nê qeyûmî ra wazenê bigîrê. Çunke manayê qeyûmî rant o. Pêro keda şarî û destkewteyan pêşkêşê hetê xo keno. Ma nêzanê ke rewşa şaredarîye ya nikayî senîn a û ma do şaredarîye ya senîne dewr bigîrê. Naye ra zî no weçînayîş weçînayîşêko mnormal nîyo. Rewşa şaredarîye senî bena wa bibo, ma bi çi şertan dewr bigîrê zaf muhîm nîyo. Çiyo muhîm o yo ke ma do bi şarê xo qerar bidê û pîya çareser bikê. Ma seba naye bîyî namzed.”

ŞAR QEYÛMÎ RA ACIZ O

Mahmut Yalçin zî vano şarê Gimgimî qeyûmî ra aciz o û dewamê qiseykerdişê xo de wina va: “Şar wazeno ke kesê weçînayeyî şaredarîye îdare bikê. Kesê ke bi waştena yewî ameyê îdareyî ser çiyê nêdanê şarî. Şar îradeyê xo wazeno. Eke wina nêbo manayê weçîmayîşî çin o. Ma mabênê şarî de yê û vînenê ke şar na rewşe ver zaf aciz o. Qeyûmî xizmete ra wet, şaredarîye kerda binê deynê giranî. Ma seba ke şarê xo rê xizmete bikerê yenê. Bi îdareyê şefafî, wazenê ke qeraran bi şarê xo bigîrê û bajarê xo pîya awan bikerê. Ma do 31’ê Adare de, bi ferqê muhîmî şaredarîye destê qeyûmî ra bikê azad û bîdê destê îradeyê şarî.”