Qezayanê Amedî ra Kayapinar o ke wayîrê 300 hezar nufusî yo û 2016’î ra nat hetê qeyûmî ra yeno îdarekerdene de, namzedê hemşaredarîye yê Partîya Şaran a Demokratîke (HDP) Necatî Pîrînççîoglu û Kezîban Yilmaze wazenê ke verê nê talankerdişî bigêrê.
Qeyûmo ke herinda Partîya Herêmanê Demokratîkan ya ke 2014 de se ra 54.0 rayî şaredarîye qezenc kerdebî ameyo tayînkerdene sere de çî-mîyê şaredarîyê yê ke nênê antene rotî. Namzedanê hemşaredarîye yê HDP’yî ard ziwan ke ê do weçînitişê 31’ê Adare ra dima nê “talankerdiş“î bidê vindernayene û bajarî do şarî reyde îdarê bikerê.
Pîrînççîogluyî ard ziwan ke ê do şaredarîya cimatkî ya ke verê ci ameyo girewtene bidê dewamkerdene û vat, “Wexto ke qeyûm ame, tabelayê bi Kurdkî wedaritî, ver çarna ra sembolanê bajarî. Abîdeyê Roboskî, abîdeyê sey Ogur Kaymaz û Apê Musayî ameyî wedarnayene. Ma do nê abîdeyan newe ra ca bikerê.”
Pîrînççîogluyî bale ante serê polîtîkaya talanî û vat, “Nînan qeyûmî rê qeyûm tayîn kerdo. Taybetmendîyêka nê qeyûmî ya winasîye zî esta. Qeyûmo verên rîyê bêusulîye ra wezîfe dest ra ame girewtene û no qeyûm zî herinda ey de ame. No qeyûm zî çî-mîyanê nêantîyan yê şaredarîye roşeno. Ma do na polîtkaya înan ya talankerdişî şarî rê qal bikerê.”
Kezîban Yilmaze bale ante awantajanê Kayapinarî yê sosyo-ekonomîkî ser û vat, ê do polîtîkayê ke nîyadayîş û rengê cinîyan danê teber bikerê xo ver. Yilmaze ard vîrî ke keyeyê bextwaştişî yê ke ameyê akerdene hetê qeyûmî ra ameyê padeyene û ê do reyna nê sazgehan a bikerê û seba îstihdamê cinîyan do xebatan bikerê.