Nasir Yagiz: Do nêeşkê serewedaritişê biîhtîşamî vindarnê

Nasir Yagizî xoverdayoxê grevê vêşanîye tepişte Zulkuf Gezeno ke hemverê tecrîdî de çalakîya fedaîye kerdebî bi vîr ard û vat, “Êyê ke ters û teslîmbîyayîşî ma ser o ferz kenê se kenê wa bikerê do nêeşkê serewedartişê fedaî yê biîhtîşamî vindarnê.”

Nasir Yagizo ke seba wedartişê tecrîdê serê Rayberê Şarê Kurdî Abdullah Ocalanî 119 rojî yo grevê vêşanîye de yo, seba Zulkuf Gezeno ke zîndan de çalakîya fedaîye viraşte peyamêk weşana. Nasir Yagizî vat ke ganî şaro Kurd peyamê Zulkuf Gezenî rind mana bikero û peyamê xo de nê vatî:

“Kesêk ke zerrîya ci azadîye rê bîya pêgirewte û zerrîya xo ya fedaîye de şarê xo kirişneno tu hêz nêeşkeno a zerrî tepişte bigêro.  Peymeyê fedaîtîye yê dewrî ke bi felsefeya Rayberîye bîyê xurt, şexsîyetêk ke xo fedayê şarê xo û dewaya xo kerdo, nê pêro şexsê embaz Zulkuf Gezenî de vejîyayê werte.  Kurdistan seranser hetê dîktatorîya faşîste ra ameyo îşxalkerdene. Peymeyê fedaîtîye yê embaz Zulkufî dîktatorîya faşîste şok kerda, cenazaya ci bi hawayêkê korsanî amî remnayene.

SERKEWTIŞ DO BIBO Ê ŞARANÊ KE XO VER DANÊ

Amed sey wextê cenazaya şehîd Delal Amede û xoverdayîşanê seserre yê Sûrî yeno waştene ke xoverdayîşanê xo rê bêro xerîbkerdene û newe ra hetê faşîzmî ra ameyo îşxalkerdene. Hêzê ke ters û teslîmîyetî ferz kenê se kenê wa bikerê do nêeşkê serewedartişê fedaî yê biîhtîşamî vindarnê. No ruho ke bîyo perçeyê şarî û bîyo fedaî do hîna zaf bibo girseyî û Newroze de vejîyo tîtikî û weçînitişanê 31’ê Adare de sey sîleyêk bigino rîyo tarî yê dîktatorîya faşîste ro.

Rayberîye gama vana ‘Êyê ke îdîaya înan a cuye pîl a ganî cehdê înan zî pîl bo’ veng dana ma ke ma gureyanê dewrî bica bîyarê. Naye ra şehîd Zulkuf Gezen, bi na çalakîya fedaîye ya şorişgêre wayîr nê gureyî rê vejîya û seba ma hemine peyme aferna. Ganî ma zî sey şar bi organîzebîyayîşêkê biîhtîşamî bieşkê serewedartişêkê pîlî biafernê!

Nê bingeyî de ganî şaro Kurd mesajê embaz Zulkuf Gezenî rast mana bikero, bi ruhê fedaî yê prosesî dorê Rayberîye de bêro têhet. Serkewtiş do yê ma bo, do yê şaranê xoverdayoxan bo.”