Merkezê Îrtîbatî û Çapemenîye yê HPGyî derheqê şehadetê hîrê gerîlayan de yê ke Amed de şehîd bîyî, eşkerayîye daye û nê vatî:

"24ê teşrîna verêne de qezaya Licê ya Amedî de mabênê hêzanê ma û artêşa tirke de pêkewtiş qewimîya. Hemrayê ma Bedran, Ciwan û Seyîd  yê ke nê pêkewtişî bi cesaretê pîlî  şer kerd, heta hela peyêne erjanê azadîye rê pabeste mendî û tewrê kerwanê şehîdan bîyî. Şehadetê hemrayanê ma rê do bibo sebebê xurtkerdişê têkoşînî. 

Ma keyeyanê erjîyayeyan ê hemrayanê xo Bedran, Ciwan û Seyîdî rê  û şarê welatperwerî yê Kurdîstanî rê serweşîye wazenê  û sozê serkewtişê têkoşînî danê.

Nasnameyê hemrayanê ma yê şehîdan wina yê:

Hemrayê ma Bedran keyeyêkê welatperwerî yê Amedî de yeno dinya û bi kulturê welatperwerîye beno pîl. Hema domanîya xora têkoşînê ma nas keno. 2009 de aktîf tewrê xebatanê ciwananê welatperweran ê şorişgêran beno û bajaranê Kurdîstanî de mîyanê xeylêk çalakîyanê protestoyî de ca geno. Semedê pewerdeyê unîversîte şino Agirî û tîya zî xebatanê xo domneno. Hemrayê ma Bedran 2012 de verê xo dano koyanê Kurdîstanî û tewrê refanê gerîlayan beno. Perwerdeyê xo yê verênî herêma Avaşînî de vîneno û tîya di serrî maneno. 2014 de semedê pawitişê şarê xo şino Rojawan û yew serre vera çeteyan şer keno. Dima ra vazdano gazîya şarê êzidîyan semedê korîdorê Şingalî yê vera Rojawanî gurîyeno. Bado ke bi se hezaran êzidîyî hêrişê çeteyan ra yenê xelisnayene, verê xo dano Şingalî. Rixmo ke birîndar beno zî têkoşînî ra peyser game nêerzeno. Şingal de xeylêk tecrube keno pêser û agêreno koyanê Kurdîstanî. Hemrayê ma Bedran ê Akademîya Leşkerî ya Mahsum Korkmazî de tewrê perwerdeyî beno, dima ra verê xo dano warê Amedî û xeylêk çalakîyanê serkewteyan de ca geno.

Hemrayê ma Bedran keyeyêkê welatperwerî yê Amedî de yeno dinya û bi kulturê welatperwerîye beno pîl. Domanîya xo de seba ke tim babîyê xo zîndan de zîyaret keno, faşîzmê dewleta tirke dahîna rind nas keno û vera nê bi hêrsê pîlî beno pîl. Seba ke hetê ekonomîkî ra paştî bido keyeyê xo mektebî caverdeno û xebityeno . Hetê bînî ra xebanê ciwananê welatperweran ê şorişgêran de ca geno. Hemrayê ma ciwan 2014 de yeno destbendkerdene, raştê îşkenceyî yeno û 5 serrî zîndan de maneno. Hemrayêma Ciwan şertanê zîndanî açarneno akademîya şorişî  û xo perwerde keno. Bado ke zîndanî ra vejîyeno tedawî vîneno û dima ra tewrê xebatanê YPSyî beno. 2020 de Amed de tewrê refanê gerîlayan beno û xeylêk waranê Amedî de falîyet rayra beno.

Hemrayê ma Seyîdo ke keyeyêkê welatperwerî yê Êlihî de yeno dinya seba ke mîyanê welatperweran de beno pîl, PKKyî hole nas keno. Ciwanîya xo de tewrê xebatan beno û dima ra verê xo dano koyanê Kurdîstanî û Amed de tewrê refanê gerîlayan beno. Badê Perwerdeyê leşkerî sey gerîlayêkê serkewteyî pratîk de cayê xo geno. Xeylêk waranê Amedî de gerîlatîye keno û çalakîyanê vera artêşa tirke de ca geno û derban dano îşxalkeran ro. "