Merkezê Îrtîbatî û Çapemenîye yê HPGyî da pêhesnayene ke par hêrişê hewayî yê Dêrsimî de Emîne Çîftçî (Dîlane Cotkar), Beyan Dara (Melsa Tilora) û Havva Baran (Amara Çîya) şehîd bîyî û nasnameyê înan eşkera kerdî.

Eşkerayîye de derheqê şehîdan nê ameyî parekerdene:

''Hemraya ma Dîlane 1986î qezaya Misircî ya Sêrtî de ameya dinya. Embaze Dîlane domanîya xo de PKKyî sey têgêrayîşê newe ra bîyayîşî û azadîye nas kena. 2004 de vera sîstemê hêrişkarî yê dewleta tirke verê xo dana koyanê Kurdîstanî û tewrê sefanê PKKyî bena. Embaze Dîlane bi felsefeya Rayberîye xîret kena ke xeta cinîya azade  de bicîwîyo û bidê ciwîyayene. Serra 2010î de verê xo dana Dêrsimî ke têkoşînê ma de muhîmîya ci ya tarîxî esta. Embaze Dîlane ke fermanare û hemrayêka nimûne bî heme wezîfeyê xo biserkewtişî ardî ca û bîye hemrayanê ma yê rayberan ra yewe.

Hemra Melsa 1992 de Colemêrg de ameya dinya û keyeyêko welatperwer de bîya pîle. Serranê xo yê ciwanîye de  PKKyî nas kena  û polîtîkaya qirkerdişî ya dewlete ra bena şahîd. Seba ke nêeşkaye vera zulmê dewlete yê vera şarê kurdî de bêveng bimano serra 2010î de verê xo da koyanê azadan ê Kurdîstanî. Embaze Melsa tim bi îdeolojîya Rayberîye xo perwerde kerd û heme herêman de bîye wayîrê serkewtişanê pîlan. Embaze Melsa ke Dêrsim de têkoşînî rê rayberîye kerde heta hela peyêne mewzîya têkoşînî ra qet peyser game nêeşte.

Hemra Amara 1996 de Amed de ameya dinya û bi naskerdişê têkoşînê PKKyî bîya pîle. Serra 2014î de vera polîtîkaya asîmîlasyon û înkarî ya dewleta tirke  Dêrsim de tewrê têgêrayîşê azadîye bena. Wextanê tewr zehmetan de rixmê heme şertan zoran bi bawerî û îradeyê girdî têkoşîn kerd. Embaze Amara roja tewrbîyayîşî ra heta hela şehadetê xo heme wezîfe û berpirsîyarîyê xo bi fedakarîya pîle û ruhê fedayî yê Apoyîye ardî ca.

Embazê ma Dêrsimo ke dewlete bi hezaran kurdî tede qetil kerdî de vera dişmenî têkoşîn kerd  û tewrê kerwanê şehîdan bîyî. Şehîdanê ma reyna ramojna ke gerîlayê azadîye do çirey têkoşînî cameverdî û tewr peynî ser bikewê. Na çarçewe de ma sere de keyeyanê erjayeyan ê hemrayanê xo Amara, Dîlane û Melsa û heme şarê welatperwerî yê Kurdîstanî rê serweşîye wazenê û sozê serkewtişî newe kenê.''