Îdareyê Xoserî yê Şingalî bi wesîleya serrgêra desine ya Fermanê 3yê Tebaxe Şingal de, vizêr bi şîarê 'Seba Komelê Êzidîyan Edalet û Azadîye' konferansêk serûber kerd.

Şingal, Başûrê Kurdîstanî û Iraqî ra xeylêk temsîlkarê dezgeh û rêxistinan, akademîsyen, nuştox û roşnvîrê êzidîyî tewrê konferansî bîyî.

Konferans qiseykerdişan ra dima bi netîcenameyî qedîya.

Endamê Komîteya Amadekarîye Argeş Şengalîyî netîcenameyê konferansî wend.

Netîcename wina yo:

''-Sere de hukmatê Iraqî pêro welatê Ewropa ganî jenosîdê vera êzidîyan bişinasnê û bi nê hawayî seba êzidîyan 'heq, huqûq û edalet' bêrê caardene.

-Seba caardişê edaletî ganî heqê xopawitiş û xoîdarekerdişî yê êzidîyan bêro şinasnayene.

-Wa Mehkemeya Heqanê Merdiman a Ewropa û Dîwanê Edaletî yê Laheyî seba caardişê 'heq, huqûq û edaletî' cerganê DAÎŞî, hemkaranê DAÎŞî û keyeyê Barzanîyan muhakeme bikerê.

-Wa Peymana 9ê Teşrîna Verêne bêra betalkerdene û hêrişê dewleta tirke yê vera Şingalî bêrê astengkerdene.

-Rayber Apo wayîrê fikrê Neteweya Demokratîke yo û ey êzidîyî fermanî ra pawitî. Êzidîyan Şingal bi fikr û felsefeya Rayber Apoyî pawit û Îdareyo Xoser nînan ser o înşa kerd.

-Neteweya Demokratîke seba pêro şaranê Iraqî wayîra hêzê çareserîye ya.

-Azadîya Rayber Apoyî azadîya ma ya. Ma heta ewro seba ney têkoşîn kerd û nika ra pey zî do seba ney têkoşîn bikerê.

-Şarê Iraqî û hukmatê Iraqî wa bizanê ke vera krîzan rayîrê felate neteweya demokratîk a.

-Pêro êzidîyî zanenê ke neteweya demokratîke rayîrê caardişê heq û azadîyan û astengkerdişê fermanan o. No Şingal de ame awankerdene. Coka ganî pêro êzidîyî abigêrê Şingalî û seba azadîya xo têkoşîn bikerê. Şingalijî wa abigêrê Şingalî û wayîrê têkoşînê êzidîyan vejîyê. Ma venga pêro êzidîyan û dostanê xo danê ke hîna zaf paştî bidê têkoşînê şarê xo.

-Nê esasî ser o konferansê ma bi serkewtişî qedîya. Ma şehîdanê Fermanê 74inî bi rêzî yad kenê. Seba ke xo fermanan ra bipawê û xo îdare bikerê ma do têkoşînê xo pîlêr bikerê. Ma do fermanî xo vîr a nêkerê û nêdê vîrakerdene. Heta ke faîlê nê fermanî nêrê muhakemekerdene seba êzidîyan heq û edalet do nêrê caardene. Heta ke seba êzidîyan edalet bêro caardene ma do têkoşînê xo pîlêr bikerê.''