Binarê Qendîlî yê Başûrê Kurdîstanî de saete 11.00 de şayîya Newroze dest pêkerd. Başûrê Kurdîstanî û parçeyanê bînan ra bi hezaran kesî serê sibayî verê xo da warê Newroze yê Binarê Qendîlî. Şayîye 11.00 de pê deqayêkê rêzgirewtişî dest pêkerde.

Adirê Newroze hetê keyeyanê şehîdan ra ame tavistene. Dima qiseykerdişanê Rayberê Şarê Kurdî Abdullah Ocalanî ra sînevîzyonêk ame mojnayene. Hemwelatîyan pê deyîranê hunermendan govend girewt.

Emser şayîye binê gefê hêrişî yê dewleta tirke de ameye kerdene. Qiseykerdişan seba şiknayîşê tecrîdê vera Rayberê Şarê Kurdî Abdullah Ocalanî û caardişê yewîya neteweyî mesajî dîyayî.

Mesajanê Newroze ra tayî wina yê:

Meclîsê Şarî yê Qendîlî: ''Ganî ma yewîya neteweyîye bikerê armancê verênî û pêkewtişê şexsî û partîyan ra dûrî vinderê. Hukmatê Herêma Kurdîstanî vera hêrişanê dewleta tirke bêveng a.''

KJK: ''PDK seba ajanîye û îstîxbaratî dewleta tirke rê ardim keno û karê ci keno asan. PDK verî ra nata vera têgêrayîşê ma dewleta tirke reyde bi nimitkî xebitîyayêne. La ewro hînî pêro karanê xo eşkera keno. Wa şarê ma ney bizano.''

Komîteya Azadîya Seba Abdullah Ocalanî: ''Derheqê weşîya Rayberîye de tay îdîayî estê. Ganî bizanîyo ke Rayberîye xeta ma ya sûr a.''

Hemsereka Têgêrayîşê Azadîye Tara Hisên: ''Hukmatê Herêma Kurdîstanî vengê azadîwaştoxan kena nizmêr. Coka sîstemê ci rijîyeno.  Ganî ma Başûrê Kurdîstanî de sîstemêkê neweyî awan bikerê.''

Sîyasetmedar Mihemed Emîn Pêciwînî: ''Kurdan soz da Rayber Apoyî. Kurdî heta ke peynîya îşxalî û rejîmê dewleta tirke bêra do bixebitê.''

Têgêrayîşê Cinîyan ê Azadan ê Kurdîstanî (RJAK): ''Wa Newroze biba wesîleya yewîya kurdan û cinîyan.''