Newroza 2013î ra dima ke tede mektuba Rayberê Şarê Kurdî Abdullah Ocalanî amebî wendene, tewr zaf Newroza 2021î qerebalix bîye. Bi se hezaran hemwelatîyî pê kincanê xo yê tradîsyonelan tewrê şayîya  Newroze bîyî. Semedo ke qeyûmî wesayît nêda û seferê wesayîtan kêmîna şar pê îmkananê xo resa Parka Newroze. 

Endamanê Torra Ziwan û Kulturî û Platformê Ziwanê Kurdkî warê Newroze de xeylêk standî akerdî û seba kampanyaya kurdkî îmzayî arê dayî. Şarî eleqeyêko pîl mojna standan. Aktîvîstanê ziwanî bi hezaran îmzayî arê dayî.

Girseyî warê Newroze de seba azadîya Rayberê Şarê Kurdî Abdullah Ocalanî sloganî vatî, posterê ci akerdî û vat: ''Bêserek cuye nêbena'' û ''Biciwîyo Serek Apo''

Warê Newroze de tewr zaf alayanê PKKyî bale ante ke Wezîr Suleyman Soyluyî vatêne 'Ma PKK qedîna.'

Girseyî vera tecrîdî nêrazîbîyayîşê xo ard ziwan û wayîrê çalakîya grevê vêşanîye yê tepişteyan vejîya. Girseyî pankarta 'Ruhê Newroze ewro zîndanan de gandar bîyo û resayo manaya xo ya tarîxî.'' akerde.

Şarî vera dewaya qefilnayîşê HDPyî nêrazîbîyayîşê xo ard ziwan û vat: ''HDP şar o şar tîya de yo.'' Girseyî seba yewîya neteweyî zî bêmabên vateyê Cigerxwînî ard ziwan: ''Eke şima nêbê yew şima do şorê yew bi yew.''

Girseyî  pê sloganan azadîya Rayberê Şarê Kurdî Abdullah Ocalanî waşte û Îmrali selam kerd.

Cinî û ciwanan zî wedaritişê Peymana Îstanbulî şermezar kerd.

Şayîya Newroze ra dima ciwanî warê Qamişloyî ra ver bi Goristanê Yenîkoyî şîyî. Ciwanan rayraşîyayîş de sloganê sey 'Bêserek cuye nêbena', 'HDP şar o şar tîya de yo', 'Biciwîyo Serek Apo' vat. Şayîya Newroze pê waştişê azadîya Ocalanî dest pêkerd û bi heman hawayî qedîyaye.