Omer Ocalan: Ganî CPT vera tecrîdî tewirê xo bimojno

Wekîlê HDPyî yê Riha Omer Ocalanî ard ziwan ke ê nêzanenê Îmrali de se beno, birnayîşê telefonî qesawetê înan zêdînayo û vat: ''Pê tecrîdkerdişê Abdullah Ocalanî Tirkîya erzîyena mîyanê bîrê bêbinî.''

Wekîlê HDPyî yê Riha û birazîyê Rayberê Şarê Kurdî Abdullah Ocalanî Omer Ocalan derheqê tecrîdê vera Abdullah Ocalanî de ANFyî rê qisey kerd.

Omer Ocalanî vistî vîrî ke weşîya Rayberê Şarê Kurdî ser o medyaya komelkî ser o tay îdîayî weşanîyayî û vat: ''Çimeyê nê parekerdişan wekîlêkê MHPyî îşaret keno. Dewlete bi hawayêkê plankerdeyî têgêrena. Serrêke ra nata keye û avûkatî nêeşkenê şorê Îmraliyî. 25ê adare de babîyê mi, ez û wasîyê Abdullah Ocalanî Mazlûm Dînç ma seba pêvînayîşê telefonî serdozgerîya Riha de amade bîyî. Babîyê mi şi zere û 20 deqayan ra dima vejîya teber. Babîyê mi vat telefon birîyayo. Ma serdozgerîye reyde qisey kerd la ey vat pêvînayîş qedîya.''

Omer Ocalanî pare kerd ke tewr peyêne 27ê nîsane de Rayberê Şarê Kurdî reyde pêvînayîşê telefonî ame kerdene û vat: ''Ê pêvînayîş 25 deqa nê pêvînayîşî zî 4 deqa dewam kerd. Birêz Ocalanî pêvînayîşê 25ê adare de da zanayene ke  pêvînayîşê telefonî raşt nîyo û telefon birîya. No pêvînayîşêko korsan o. Dewlete naye bi hawayêkê plankerdeyî kena. No kerdiş qanûnî nîyo û heqanê merdimîye binpay keno.''

Omer Ocalanî îfade kerd ke Rayberê Şarê Kurdî Abdullah Ocalanî nê 4 deqayan de hîşyarîyê girîngî dayî û vat: ''Birêz Ocalanî bêhuqûqîya dewlete dîye û tehlukeyê nê pêvînayîşî rexne kerd. Ey waşt wa avûkatî şorê Îmrali de ey bivînê. Dima telefon birîya. Dewlete kayêkê pîlî û gemarinî kay kena. Ganî Wezaretê Edaletî derheqê na mesele de eşkerayîye bido. Xebera ma pê weşîya Birêz Oclanî çin a. Qesawetê ma zêdîya.''

Omer Ocalanî ard ziwan ke Îmrali de Rayberê Şarê Kurdî rê îşkence yeno kerdene û vat: ''CPT qaşo vera îşkenceyî ronîya. Îmrali de Birêz Ocalanî rê îşkence yeno kerdene. Dezgehê huqûqî, pawitoxê heqanê merdiman, CPT ça de yê? Ganî CPT vera na rewşe bi hawayêkê cidî tewirê xo bimojno û mesuldarîya xo bîyaro ca. Ganî Konseya Ewropa, Yewîya Ewropa û Mehkemeya Heqanê Merdiman a Ewropa nê kerdişan ra semed Tirkîya rê teda bikerê, aye hîşyar bikerê.''

Omer Ocalanî peynîya qiseykerdişê xo de wina vat: ''Pê tecrîdkerdişê Abdullah Ocalanî Tirkîya erzîyena mîyanê bîrê bêbinî. Tecrîd seba Tirkîya prosesê şer, krîz û alozî yo. Hewceyê Tirkîya pê prosesê çareserîye û dîyalofan esto. Mesele pê tecrîdî çareser nêbena. Birêz Ocalanî timî nê çîyî pêşnîyaz kerdî. Meseleya kurdan pê rayîranê demokratîkan çareser bena û muxatabê ci zî Birêz Ocalan o. Wextê prosesê çareserîye yê 2013-2014î de wina bi û aramîye ameye Tirkîya. Proses 2015 de qedîya û ê wextî ra nata şer esto. Her roje bi seyan merdimî tepişîyenê, merdimî kişîyenê. Dewlete bi hawayêkê raştî tênêgêrena. Şarî waranê Newroze de mojna ke weşîya Abdullah Ocalanî weşîya înan a. Şarî Newroze de Birêz ocalan nîşan da û mesaj da dewlete.''