Parlamenterê HDPyî yê Dersimî Alîcan Onluyî derheqê hêrişê vera peykerê Hasret Gultekînî de eşkerayîyêke daye û ard ziwan ke êyê ke îdîa kenê ke şarê Dêrsimî peykerê Gultekînî nêwazeno sey nameyê Duzgun Babayî wazenê şehîdanê Sêwasî zî bikerê malzemeyê rantî.

Onluyî vat: ''Vîrdarîya Hasret Gultekînî û kaîdeyê ke nameyê 33 gananê ke Qierkerdişê Sêwasî de şehîd bîyî raştê hêrişêkê xayînî ameyî. Goreyê plankerdişî gerek 16ê temmuze de Cemxaneyê Duzgun Babayî yê Qisle de akerdişê ci biameyêne kerdene  la peyker cayê ci ra ame raqilnayene û erzîya peyê cemxaneyî.

Nê hêrişî leyminî  ke zaf ganê ma dejna, ma şermezar kenê. Pîya bi nê hêrişî tewirê Îdareyê Cemxaneyê Duzgun Babayî zî ma dejna. Înan îdîa kerd ke Dêrsim de tay dezgeh û kesî peykerê Gultekînî nêwazenê la no raşt nîyo. Hasret Gultekîn û şehîdê Sêwasî erjo muhîm yê komelê elewîyan o. Sêwas de têna roşnvîr, nuştox û hunermendî nê eynî wextê de ame waştene ke kultur, îtîqat û erjê elewîyan bêrê qirkerdene û çînkerdene. Coka her xebata semedê şehîdanê Qirkerdişê Sêwasî sere de Dêrsim de hetê komelê elewîyan ra yena wayîrvejîyayene. Qet elewîyêk/e vera vîrdarîya Hasret Gultekînî nêvejîyeno, nêeşkeno vejîyo. Saz û vateyê Gultekînî tarîxê şarê elewîyan o.

No hêriş hetê kesanê ke wazenê naye ra rant bifînî dest ameyo kerdene. Tay kesê ke nameyê Duzgun Babayî semedê rantî şuxulnenê, nika zî wazenê şehîdanê Sêwasî semedê rantê bişuxulnê. Ma heta ewro cayê rantî de nêvindetî do mevinderê. Kesê ke Îdareyê Cemxaneyê Duzgun Babayî de yê, eleqeya partîya bi înan çîn a. Ma sey şarê Dêrsimî gerek peykerê Gultekînî cayo tewr rind ê Dêrsimî de ronê. Ma tîya ra veng danê Şaredarîya Dêrsimî zî bêrê ma pîya vîrdarîya şehîdanê Sêwasî destê rantkeran ra bigêrê û şarê xo reyde bîyarê têhet.''