Yeno plankerdene ke cayanê fîrazan ê Dêrsimî ra Çewres Çimeyan de sena turîzmî otêlêke bêra akerdene. Çewres Çimeyê ke sey Çimeyanê Halworî zî yenê şinasnayene semedê Terteleyê Dêrsimî ra zî seba şarê Dêrsimî zaf girîng ê. Wekîlê HDPyî yê Dêrsimî Alîcan Onluyî pê vernîyazêkê persan babete berde Meclîs.

Onluyî vat: ''Halworî cayo ke rayberê eşîranê Dêrsimî rayberîya Seyîd Rizayî de Terteleyê Dêrsimî de uca de ameyî pêser û înan bire daye ke pîya têbigêrê. Reyna şarê Dêrsimî Halworî de ame qetilkerdene. Halworî vîrê şarê Dêrsimî yo. Dêrsim cara pê HESan, awbendan û înşaatan teno texrîbkerdene. Walîyê Dêrsimî yo ke koyanê Dêrsimî ser o 'Oyo ke vano ez tirka wa weş bo' dabi nuştene, nika zî xîret keno ke vîrê Dêrsimî wa bêro çinkerdene. Otêla ke uca de do bêra viraştene do zerar bida cuye. Seba nê projeyî rêxistin, partî û şarê Dêrsimî ra tesdîq zî nêame girewtene. No kerdiş bêwijdanî, bêhuqûqî û bêaqilî yo.''

Onluyî nê persî persayî:

-Cayêk de ke seba şarê Dêrsimî hetê bawerî, kultur û tarîxî ra girîng o, pê akerdişê warê turîzmî çita yeno armanckerdene?

-Seba naye tesdîqê şarê Dêrsimî ame girewtene?

-Seba nê projeyî raporê xoza û domeyî ame amadekerdene?

-Derheqê projeyî de rêxistinanê komelê sivîlî, odayanê karî û îdareyanê herêmîyan reyde pêvînayîşêk ame kerdene?