Cayanê bimbarek ê Dêrsimî ra Çimeyanê Halworî de yeno plankerdene ke otêlêke bêro viraştene. Vervatoxê Pawitişê Mîrasê Tebîî yê Kulturê Dêrsimî Bariş Yildirimî vat ma do wayîrê erdê xo yê bimbarekî bivejê û destûrê înan medê. Rojnamegerê Denîze Bîlgîne zî vat ganî ma bi xo erdê xo yê bimbarekî bipawê.

Bariş Yildirimî  vist vîrî ke Çimeyê Halworî  yê ke  sînorê Parka Mîlî ya Dola Munzûrî de yê semedê dêrsimjan cayêko bimbarek o û vat: ''Çimeyê Halworî yê ke wayîrê rindîya bêhempaye warêko biheybet ê tebîetî yo. Xeylêk cayanê ra awa çimeyî vejîyena. Goreyê Qanûnê  Parkanê Mîlîyan ê 2872yî  ganî Çimeyê Halworî bêrê  pawitene. Çimeyî hetê bînî ra hetê kultur û îtîqadî ra warê mîrasî yê. Çimeyî semedê eleweîyan zîyaretgeh ê, mekanê Kavl-û karar ê. Tîya viraştişê otêle goreyê vîjdan û huqûqî nîyo. Ganî cade no projeyê otêle bêro îptalkerdene nêke ma do muracatê rayîranê huqûqîyan bikerê. Ma de vera naye tê bigêrê destûrê înan medê''

Rojnameger û nuştoxe Denîze Bîlgîn a dêrsimijî zî hesabê xo yê medyaya sosyale ra no proje sey hêrişê vera erjanê elewîyan û dêrsimijan name kerd û vat: ''Dêrsim xoza yo, îtîqad, kultur, vîr û ziwan o. Heme yewbînan rê pabesteyê. Pîya bi koyanê ma îtîqad, kultur û vîrê ma binê tehdît de yê. Wazenê ke newe ra qir bikerê. Hem dewlete hem zî xebitnayîşê herêmî yê ke dewelete înan rê paştgêrê kena nînan anê ca.  Dewa Mulu ( ya ke bi ocagê kerrayan yena talankerdene) Çimeyê Halworî û Çimeyê Munzurî yew ê, ferqê înan çîn ê. Qirkerdişê Dêrsimî heme yewbînan rê pabesteyê.  Ganî her kes dewe, hêga, dare, ko û bexçeyê xo bipawo.''