Dewanê Hûzeran, Akûnis, Govan, Lanîlan, Xûlepûr, Kekulan, Sûreh, Pertawan, Kuran û Mezra Pisyanî yê qezaya Xîzanî ya Bedlîsî de 2ê temmuze qedexeyê tebervejîyayîşî  ame îlankerdene. Badê qedexeyî bi tewrbîyayîşê bi seyan leşker û qoricîyan hêrişê îşxalî dîya destpêkerdene. Qedexeyê tebervejîyayîşî 6ê temmuze ame wedartene la hêrişê îşxalî dewam kerd. 14 temmuze dewê Xûlepûr û Kekulanî zî tede waro hîra sey ''Herêma Asayîşê Taybetî'' ame îlankerdene.

Goreyê xebera Ajansê Mezopotamya badê qedexeyê tebervejîyayîşî destûr nêdîya şar vejîyo teber û heywanî bi rojan axir de mendî û hêgayê ramiteyî bêwahîr mendî. Mabênê dewanê Xûlepûr û Kekulanî têdima ame dîya bombayan ver. Dormeyê dewan de kamarayê mobese ameyî cakerdene. Rîyê bombardumanî ra bi seyan darî vêşayî. Makîneyanê karî ziraro pîl da xoza. Waranê daristanî de semedê viraştişê rayîrî bi seyan darî ameyî birnayene.

Hetê bînî ra pêkewtişê giranî zî qewimîyayî.  26-27ê temmuze mabênê dewanê Sûreh û Hûzeranî de pêkewitşî giran bîyî. Herême pê helîkopter û droneyanê çekdaran ameye bombardumankerdene. Pêkewtişan de leşkerêk birîndar bi.

27ê hezîrane de dewa Hûzeran de axurêk gerîya binê ablûqa. Dormeyê dewe zî bi temamî ame girewtene. Vejîyayîş û dekewtişê dewe ame qedexekerdene. Leşkeranê tirkan ê îşxalkeran veng da gerîlayê HPGyî yo ke girewto binê ablûqa, waşt wa teslîm bibo. Gerîlayî bi vengê berzî vat o do teslîm mebo û axur de vengê teqayîşî ame. Badê teqayîşî bombayî erzîyayî zere û axurî ser adir ame varnayene. Gerîlayê HPGyî yo ke teslîm nêbi, şehîd bi. Cenaza bi ambulansî ameye berdene.

Rîyê teqayîşî ra desê xeylêk baran qelişîyayî. Tay desî zî rijîyayî. Dewe hetê bi seyan leşkeran ra binê ablûqa de ya.