Koordînasyonê PAJKî derheqê xoverdayîşê gerîlayanê YJA-Starî yê vera herişanê dewleta tirke de mesajêkê fîrazkerdişî weşana. 

Mesaj wina yo:

''Têkoşînê ma yê azadîya Kurdîstanî serkêşîya Rayber Apoyî de keweno serra 50. û pêro dinya de xorin beno. Vera paradîgmaya Rayber Apoyî verê çimanê dinya de şerêk yeno kerdene. Hêzê modernîteya kapîtalîste pê tersî ewnîyenê Kurdîstan û Mezpotamyaya qedîme ra. Merdimîye Leyla Qasim ra heta Zarîfa, Kawaya Hêsinkarî ra heta Mazlum Doganî, Besêyan ra het Zîlanan beno şahîdê coşê çemê xoverdayîşî. Ma zanenê ke çêrê pîlî eşkenê mîyanê zehmetîyanê pîlan ra vejîyê û nê zahmetîyan bi bawerî, vîr, zerrî û eşqêkê pîlî wedarnê.

Çalakîyê HPG û YJA-starî mîladêkê neweyî akenê. Ma şerê mendiş û mergî de yê. Şerêkê winasênî de her derba vera dişmenî yena manaya derba vera sîstemê Îmraliyî, derba vera dişmenanê kurdan, derba vera hişmendîya tecawuzkerî. Ewro hêzê YJA-Starî xo pê hişmendîya îdeolojîya Rayber Apoyî xorin kenê, taktîk û teknîkê xo aver benê û varanê dişmenî ser. 

Ma sey Koordînasyonê PAJKî performanê berzî, çalakîyan û derbanê YJA-Starî yê vera dişmenî fîraz kenê. Ma pê bawer ê ke nê embazê ma bi serfîrazîya xo azadîya Rayber Apoyî bîyarê ca. Şerê Zap, Avaşîn û Metîna şerê estbîyayîşê Kurdîstanî yo. Serkêşîya YJA-Starî de do vera îqtîdarê faşîstî yê AKP-MHPyî serfîrazîyêka pîle bêra afernayene. Wezîfeyê pêro cinîyan ê kurdan û milîtananê PAJKî yo ke şaran belaya AKP-MHPyî, serdestîya camêrdan ra bixelisnê. Ma sey şerwananê azadîye serkêşîya têkoşînê ney kenê.

Serkêşîya embaze Şaristane Fargîn karakterê prosesî eşkera kerd. Terzê çalakîya embaze Nalîne Firat mezgê dişmenî teqna. Terzê pirodayîşê embaze Rojbîne dişmen vist mîyanê panîk û tersî. Embaze Sîyabende Kobanê serê esasê paradîgmaya Rayber Apoyî de gerîlatîya fedayî ya şerê azadîye de rolêko serkêş kay kerd û morê xo da binê tarîxê Kurdîstanî. Xorinbîyayîşê embaze Mizgîne Ronahî xeta azadîya cinîyan û asta azadîye de seba pêro cinîyan ê kurdan bi mîsal. Reyna embazîya Mizgîne û Rûmete yewîya ruh, fikr û çalakîye eşkera kerde. Ma pêro embazanê xo yê şehîdan bi rêzdadî, heskerdiş û minetdarî yad kenê. Ma reyna rayraşîyayîşê azadîye de pêro embazanê xo selam kenê.

Gerîlayê YJA-Starî pêro eyaletan de her roje derbanê giranan danê dişmenî ro. Ma nê derban sey nêzdîbîyayîşê serfîrazîye vînenê. Ganî dişmenî bizanê ke PKK û PAJK do bin nêkewê. Hêzê YJA-Starî se beno wa bibo îşxalkeran rê rehm mekerê. Heta ke gerîlayî est bê, têkoşînê azadîye do dewam bikero. Ma pêro embazanê xo yê gerîlayan ê cinîyan nêzdî ra teqîb kenê. Şert, moral û performansê pêro embazanê YJA-Starî hol ê, îdîaya înan est a. Tewrbîyayîşê gerîlayan ê cinîyan her cayê Kurdîstanî de asta serkêşîye de yo. 

Rayberîye vatêne 'Gerîlayê ercîyayeyî, wa mezg û zerrîya xo xurt bê.' Ma pê bawer ê ke pêro embazê ma zerrî û mezgê xo hîra bikerê, xurt bikerê û vera îqtîdarê AKP-MHPyî û hemkar û xayînan xo ver bidê. Heta ke Rayberîye azad nêba serkewtişê ma do nêvinderê. Bi na hişmendîye ma wayîrê şerwananê xo vejîyê û tewirê esasî yê gerîlatîya modernîteya demokratîke bîyarê ca. Wa pêro şarê ma layîqê nê cinîyan ê çêran û serkêşîya YJA-Starî bibê û bibê wayîrê tewirêkê şarê şorişgêrî.''