Temsîlkarê Têgêrayîşê Azadîye, Platformê Demokratanê Kurdistanî (PDK-Vakûr), Partîya Demokrat a Kurdistanî-Tirkîya (KDP-T), Partîya Komunîst a Kurdistanî (KKK) û Partîya Azadîya Merdiman (PMA) kombîyayîşêkê çapemenîye viraşt û razînêbîyayîşêkê çetinî hemverê hêrişanê ke HDP'yî ser o ameyî kerdene ramot. 

Polîsan ê Tirkan 8'ê Adare de eştibi serê awanîya Hemserekîya HDP'yî ya Bajarê Amedî, 7 çalakwanê ke grevê vêşanîye de bîyî destbend kerdîbî û dabi parlamenteranê HDP'yî Tayîp Temel û Mûrat Sarisaçî ro.

Kombîyayîşê çapemenîye yê panc partîyanê Kurdan awanîya Têgêrayîşê Azadîye de virazîya û metnêko hempar ame wendene. Serekê pêroyî yê PDK-Vakûrî Sertaç Bûcakî eşkerayî wende û vat, "Zextêko teberê huqûqî de hemverê sîyasetê Kurdan û partîyanê sîyasîyan ê Kurdan yeno kerdene."

Bûcakî wina vat, "Ma hêrişê serê awanîya HDP'yî yê Amedî şermezar kenê û wazenê ke kesê ke ameyê destbendkerdene tavilî bêrê veradayene."

HEMVERÊ SÎYASETÊ KURDAN DE ŞER AMEYO ÎLANKERDENE

Bûcakî ard ziwan ke hêrişê hemverê partîyanê sîyasîyan ê Kurdan agêrayê operasyonêkê binfînayîşî yê plankerdeyî û vat, "Lîderê Tîfaqê Cumhurî bi rojan o ke xo dusnayo zirxê pawitişê dewlete ra û partî û kadroyanê sîyasîyan ê Kurdistanî hedef ramojnenê. Na çarçewaye de propagandayêka hêrişkare kenê û atmosferê weçînitişî pîjiknenê. Wezîrê Karanê Zereyî ke asayîşê welatî ra û weçînitişî ra mesuldar o, bi beyanatanê xo hemverê sîyasetê Kurdan de şer îlan kerdo."

Bûcakî vist vîrî ke Dozgerê Komare yê Mehkemeya Berze seba girewtişê partîyanê Kurdan ê ke nameyê înan de Kurdistan ravêreno Mehkemeya Qanûnê Bingeyênî rê muracat kerdo û vat bê ke bendeyê netîceyê mehkema vindero, partîyê sîyasîyan ê ke înan de nameyê Kurdistanî ravêreno, bi hawayêkê nêhuqûqîyî zereyê lîsteya partîyanê sîyasîyan ra vetê. 

BI NIJADPERESTÎ Û ZORDARÎYE EMR NÊBENO DERG

Bûcakî vat, "Kurdistan û partîyê sîyasîyî yê Kurdistanî rastîyêka Tirkîya yê" û veng da hukmatî ke fek sîyasetê xo yê eciqnayîşî ra vera bido.

Bûcakî ard ziwan ke şaro Kurd do weçînitişî de cewab bido nijadperestî û zordarîye û vat, "Şarê Kurdî çirey nijadperestîye, neteweperestîya şovene û tewirê sîyasî yê qureyî rê rayîr nêdayo. Do çarçewaya qanûnî, aşitî û sîyasetê sivîlî de cewabo ke lazim o bêro dayene.  Bi nijadperestî û zordarîye çew nêeşkeno emrê xo bikero derg."