Temsîlkaranê partîyanê Kurdan ê Başûr, Rojakewtene, Vakur û Rojawanî Kongreya Temsîlkaranê KNK’yî de qisey kerd û ard ziwan ke armancê dewleta Tirkî qirkerdişê Kurdan o û verba naye seba yewîya neteweyî veng da.

Hemserekê PYD’yî Şahoz Hesen: “Nê hêrişî têna verba Rojawanî nîyê, verba pêroyê Kurdan ê. Naye ra ganî ma tewirêko Kurdistanî bimojnê. Roje roja yewîya neteweyî ya. Ganî ma bibê yew û destkewteyanê şarê xo bipawê.”

Îdarekarê YNK’yî Mela Baxtîyarî zî bale ante sere polîtîkayanê DYA û hêzanê mîyanneteweyî û va: “Kurdî pere nêwazenê, azadîye wazenê. Kurdî wazenê dewleta Tirkî reyde pê bikê. Birêz Ocalan û Celal Talabanî seba naye zaf xîret kerd. La dewleta Tirkî pê qirkerdişan dewab da. Se beno wa bibo, Kurdî so ser bikewê, dewleta Tirkî do nêeşke Kurdan çin bikerê.” Baxtîyarî seba wayirvejîyayîşê Rojawanî  veng da.

Serekê Fraksîyonê Goran ê Parlamentoyê Iraqî Dr. Yûsif Mihemed Sadiq: “Eke ma Kurdî verê cû yewîya neteweyî yê xo biviraştêne, Kerkûk û Efrîn de rewşe do wina nêbîyayêne. Eke ma ewro nêbê yew, pêroyê Rojawanî zî do ma destî ra bivejîyo.”

Berpirsîyarê Tekilîyanê Teberî yê QSD'yî Dr. Abdulkerîm Omar: “Ez veng dana rêxistinanê Kurdan ke verba naye bi lezabezî yewîya neteweyî bîyare ca. Şorişê Rojawanî şorişê pîyabîyayîşî yê komelî yo.”

Hemserekê PJAK'î Sîyamend Mûînî: “Çareserîya Rojawanî çareserîya Kurdistanî ya. Yewîye û tewiro neteweyî eşkenê ma azad bikê.”

Temsîlkarê PDPK-S'î Dr. Selah Derwêş: Bi hewayêkê lezabezî ma verba hêrişanê Rojawanî ganî partî û dezgehê Kurdan pêro tawirêko hempar ramojnê.”

Sekreterê Pêroyî yê Hizbî Komunîstî Îran Sazmanî Kurdistan-KOMALA Bîrahîm Alîzade: “Ganî ma pêro heta çilka peyêne ya gonîya xo dest bierzê Rojawanî.”

Têgêrayîşê Cinîyan ê Kurdan Zeynep Mûrade: “Wext wextê qiseykerdişî nîyo, ganî verba hêrişanê dewleta Tirkî Kurdî tawirêko pît bimojnê.”