PDK seba ke bimojno xizimkarêkê Tirkîya yo baş o pêro îmkananê xo pêşkêşê dewleta tirke keno û destkewteyanê Başûrî visneno binê tehlukeyî. PDK bi taybetî herêmanê Amediyê, Dêrelûk, Kanî Masî û Biradostî de têgêrayîşê îşxalî de cagêno û herême de kaos virazeno.

Goreyê çimeyan dewleta tirke Hewlêr de tay selahîyetdaranê PDKyî de kombîyayîşêko nimite kerdo û xerîtaya îşxalê herême ercnaya. PDK û hukmatê Iraqî hemkarîya îşxalî kenê. Senî ke nînan Metîna û Amedîyê de berê Serzêrê seba wesayîtanê îşxalî û tankan akerd, nika zî Girê Rowala yê Xakurkê de artêşa tirke reyde xeylêk hêzî Kolîtê de cakerdî. 

Seba ke hêrişê îşxalî Amedîyê de deşîfre bîyî, nika artêşa tirke wazena Xakurkê ra şora. Eke hemkarîya PDK û dewleta tirke Xakurkê de zî dewam bikera no do bibo sebebê protestoyanê pîlan. Amedîyê û Dêrelûk de xora hemkarîye dewam kena. Prosesê peyênî de herêma Berê Garê û dewê Mijê û Sipîndarê binê bombardumananê giranan de mendî.

Bombardumanan ra şewatî vejîyenê û nê şewatan de zî xeylêk daristanî vêşenê. Nê hêrişî dewanê Silav û Bêbadê yê Amedîyê ra bi tankanê PDK û artêşa tirke yenê kerdene. PDK koordînatan û îstîxbaratî dano artêşa tirke. PDK bi hemkarîya xo beno sebeb ke îşxalê mabênê Dêrelûk û Çemçoyî mende bibo.

 Artêşa tirke seba îşxalî gêrena ceyranî. Coka PDK awbendê Dêrelûkî ra heta gelîya Balînda û herêma Çemçoyî xeta ceyranî nan ro. Dewleta tirke seba ke kamerayanê mobese, sîstemê têkilîye, cîhazanê radar û keşfî bişuxilna ci rê ceyran lazim o. Heta nika ceyran nêdîyabi dewijan la dîya artêşa îşxalkere. PDK nê hamnanî de ceyranê şarî birneno dano artêşa tirke ya îşxalkere. 

PDK hem hemkarîya dewleta tirke keno hem zî seba ke rîyê xo yê gemarinî binimno û îxanetê xo kamufle bikero zûranê sey ''PKK bi teqaberan derbazê Dihokî bi'' mîyanê şarî de vila keno. PDK bi bahaneya nê îftîrayan gêreno keyeyan û seke hêrişî est ê mojneno. PDK armanc keno ke mîyanê şarî de ters vila bikero, nêrazîbîyayîşê şarî bikêmîno û o bi xo asayîşî ano ca.

Ancî PDK armanc keno ke wa şar destek nêdo gerîlayan, gerîlayan ra xo dûrî bigêro. PDK bi xo zaneno ke gerîlayî erdê Başûrî senî pawenê. Beno ke prosesê verê ma de tay komplogerî herême de bombayan biteqnê û dima vajê 'PKKyî kerdo.' 

Hetê bînî ra eşkera yo ke artêşa tirke bi gerîlayan nêeşkena. Gerîlayî bi nanêk û lîtreyêka awe bi rojan mewzîyan pawenê û fedakarîyanê pîlan kenê. Gerîlayî teyna armanc kenê ke îşxalî biqedînê, şar û erdê Kurdîstanî bipawê. Coka pêro komployî do bênetîce bimanê. Çunke şar raştîyan zaneno û goreyê ney têgêreno.