Menga hezîrane ra nata xîretê provakatîfî û hêrişê PDKyî zêdîyayî. Hêzanê taybetan ê PDKyî 5ê hezîrane de hêrişê gerîlayanê PKKyî kerdbi. Hêrişê PDKyî yê vera çeperanê gerîlayan waranê Girê Çarçelî û Girê Hekarî yê Metîna de bi sebebê provakasyonî û netîceya ci de 5 pêşmergeyê PDKyî merdbîyî ke hêriş hema nêame roşnîkerdene.

PDKyî no hêriş eşt milê gerîlayanê HPGyî. La HPGyî bi eşkerayîyêke no red kerd û vengê heyetêkê xoserî da ke cayê serebûtî de wa cigêrayîşan bikero. Tay heyetî şîyî cayê serebûtî la hema zî netîceyê cigêrayîşê înan nêameyî parekerdene.

Hêzê PDKyî 24ê temmuze de bi konvoyêkê makîneyanê karî, çekanê giranan û wesayîtanê zirxînan şîyî ver bi warê gelîyan ê Girê Çarçelê û naye ra semed lehzêk şer qewimîya. Semedo ke hêzanê PDKyî pê çekanê giranan gule û bombayî eştî waranê gerîlayan Metîna de şewatî dest pêkerd û şewatî bi rojan dewam kerd.

Medya de ame vilakerdene ke 26ê temmuze de hêzanê taybetan ê PDKyî Xelîfan de hêrişê gerîlayanê HPGyî kerd, hêriş de tay gerîlayî şehîd bîyî, tay gerîlayî zî birîndar bîyî.

Merkezê Îrtîbatî û Çapemenîye yê HPGyî 29ê temmuze de eşkerayîyêke daye û pare kerd ke înan 26ê temmuze ra nata komêka gerîlayan ra xeberêke nêgirewte û beno ke nê gerîlayî Xelîfand de maruzê hêrişî bîyî. HPGyî PDKyî ra waşt ke mesele ser o eşkerayîyêke bido.

PDKyî herinda ke eşkerayîye bido şanê 29ê temmuze de bi konvoyê wesayîtan ê zirxînan û sivîlan hêzê xo şawitî warê Rênçbiraxî yê Zagrosan. Goreyê agahîyan gerîlayan bi fekkî hêzê PDKyî hîşyar kerdî la hêzê PDKyî çekî antî gerîlayan ser û xîret kerd ke provakasyonan bikerê. Dima ke şarê herême kewt mabên verê provakasyonan ame girewtene.

Nê provakasyonî eşkera kenê ke PDK seba şerî xo amade keno. Hêzê PDKyî Metîna de pê kepçe, makîneyanê karî zî rayîr û çeperan virazenê, waranê sivîlan de zî cara qereqol û çeperî viraştî. Dîmenê nê amadekarîyanê leşkerîyan ê PDKyî yê vera gerîlayan ameyî girewtene.

Selahîyetdarê PDKyî pê eşkerayîyan îdîa kenê ke ê do hêrişê gerîlayan nêkerê la serebûtê ke qewimîyenê na îdîa pûç kenê.