Siyasetmedar û roşnvîrê Başûrê Kurdîstanî Mihemed Emîn Pêncewînîyî derheqê hêrişanê îşxalî yê vera Başûrê Kurdîstanî de ANFyî rê qisey kerd.

Pêncewînîyî da zanayene ke dewleta tirke zaf reyî seba îşxalî hêrişê Başûrî kerd la tim bin kewte. Pêncewînîyî pare kerd ke nê hêrişê peyênî têna vera PKKyî nîyê û vat: ''Nê hêrişî seba destvistişê zengînîya ser û binê erdê Başûrî yê. Tirkîya PKK xo rê kena bahane. Her kes zaneno ke 3 hetê Başûrî hetê dewleta tirke ra ameyê îşxalkerdene.''

Pêncewînîyî vera bêvengîya Herêma Kurdîstanî û warê mîyanneteweyî nêrazîbîyayîşê xo mojna û vat: ''Ez venga hêzanê sîyasîyan û şarê Başûrî dana ke vera îşxalî vengê xo berz bikerê. Nê hêrişî seba îşxalê Başûrî yê.  Nê di hewteyî yê adir vareno Başûrê Kurdîstanî ser, keye, baxçe, mal û mulkê başûrijan yenê vêşnayene la medyay Başûrî nê çîyan nêmojnena.''

Mihemed Emîn Pêncewînîyî ard ziwan ke çimê dişmenî de pêro kurdî seyci yê û vat: ''Hêrişî ewro vera PKKyî yê, siba do vera PDK, YNK û Goranî bibê. Coka her kes vera îşxalî rawurzo. Bernameyê Erdoganî de çinkerdişê dewaya kurdan esto, qirkerdişê kurdan esto. Coka serrgêra Qirkerdişê Armenîyan de nê hêrişî kerdî. Tirkîya bi nê hawayî mesajê qirkerdişî da kurdan.''

Mihemed Emîn Pêncewînîyî peynîya qiseykerdişê xo de wina vat: ''Erdoganî goreyê mi Iraq, Ewropa, Amerîka nê hêrişan ra agahdar kerdî. Hukmatê Iraqî vano Başûrê Kurdîstanî beşêkê înan o la vera hêrişan veng nêkeno. No tewirê înan zaf xirab o.''