Pêşmergeyê Dêrînî Mam Hazimî ard ziwan ke meseleya dewleta tirke têna PKK nê, a wazena 2023 ra verî Kerkûk, Hewlêr û Mûsilî îşxal bikera. Hazimî vat: ''Ganî her kes erk û mesuldarîya xo bikero, paştî bido Têgêrayîşê Azadîye.''
Pêşmergeyê Dêrînî yê Ranya Mam Hazimî ANFyî rê qisey kerd û vera hêrişanê îşxalî yê dewleta tirke yê serê Herêmanê Pawitişî yê Medya tewirê xo mojna.
Hazimî îfade kerd ke dewleta tirke PKK xo rê kena bahane û vat: ''Ganî şarê kurdî vera hêrişanê îşxalî yê serê Herêmanê Pawitişî yê Medya, Rojawan, Şingal û ablûqaya vera Mexmûrî paştî bido gerîlayan û Têgêrayîşê Azadîye. Ganî her kes nê prosesî de mesuldarî û erkê xo bîyaro ca. Merdimo bêtewir bêruh o. Ma 45-50 mîlyon kurd ê la Rayberê ma Ocalan zîndan de yo. Her roje îşxalkerî ci rê îşkence kenê.''
Mam Hazimî bale ante hemkarîya PDKyî û dewleta tirke ser û wina venga PDKyî da: ''Ganî destê xo bidê pê, destê ma nêşoro gonîya yewbînan. Ganî hêzê PDKyî anxî tarîxêkê gemarinî nêkerê. Birakûjî têna faydeyê dişmenî keno. Dewleta tirke bi bahaneya PKKyî hêrişan kena la a raşte hedefê ci de îşxalê xeylêk cayan est o. Mesele PKK nîya. Dewleta tirke wazena sînoranê Mîsak-i Mîllî bîyara ca. Dewleta tirke wazena 2023 ra verî Kerkûk, Hewlêr û Mûsilî îşxal bikera. Yanî Kurdîstanî ser o planê pîlêrî est ê. Coka şarê ma wa tim hişyar bo.''
