Komîteya Rayberdişî ya PKKyî bi wesîleya Newroze eşkerayîyêke daye. Eşkerayîye wina ya:

''Şayîyê Newroze bi Hemleya Azadîye ya 10ê Teşrîna Verêne resenê astêka bîne. Yanî eşkera beno ke ma Newroze de do Hemleya Azadîye ser bivisnê. Ma sere de yê Rayber Apoyî Newroza şarê ma, gerîlayan, dostan, cinî û ciwanan fîraz kenê. Ma şexsê Mazlûm Doganî de pêro şehîdanê Newroze bi minet û rêzî yad kenê. 

Rayber Apoyî Newroze resnaye manaya ci ya ewroyîne. PKKyî Newroza 1973yî têkoşînê azadîye dabi destpêkerdene. Şarê kurdî serkêşîya cinî û ciwanan de bi şarê Newroze. Emser na Newroza 52ine raşta zî bena Newroza Rayberîye. Newroze mujde dana ke têkoşîno topyekûn do azadîya Rayber Apoyî bîyaro ca.

Gerîlayî sey Rayber Apoyî Newroze bi hawayêkê raştî fîraz kenê. Xoverdayîşê Îmraliyî û xoverdayîşê gerîlayan benê yew û şarê ma rê serkewtişî mujde kenê. Gerîlayanê azadîye bi Operasyonanê Şorişgêran ê Zapî derbî dayî rejîmê faşîstî AKP-MHPyî ro. Gerîlayê azadîye yê Kurdîstanî hêzanê qirker û îşxalkeran rê Kurdîstanî kenê mezelî. Gerîlayî bi derbanê ke danê faşîzmê AKP-MHPyî ro emser adirê Newroze asmên de visnenê ta. Ma nê serkewtişanê gerîlayanê HPG û YJA-Starî zerrî ra fîraz kenê û serkewtişanê înan ê daîmîyan wazenê. Ma îfade kenê ke na serra Newroze de zî gerîlayî do serkêşîya Hemleya Azadîye bikerê.

Ewro cinî û ciwanê rêxistinkerdeyî û şarê ma yo rêxistinkerde pêro waranê Newroze kenê de û Hemleya Azadîye nê waran de kenê pîlêr. Koyan ra heta zindanan, Kurdîstanî ra heta teberê welatî her kes keno ke Newroze bikero Newroza azadîya Rayber Apoyî. Ma her keso ke seba azadîya Rayberîye qîreno selam kenê û ma venga her kesî danê ke adirê azadîye yê Newroze gir bikero.

Îqtîdarê AKP-MHPyî yo ke bi derbanê giranan ameyo verê rijîyayîşî coka seba plananê xo yê hêrişanê neweyan keno ke derûdorî ra hêzî arê bido. Eke bieşko do roşanî ra pey hêriş bikero. Wa pêro şarê ma û dostê ma ney hol bivînê. Sey têgêrayîş û şarî ganî ma nê xîretanê dişmenî ser de binderê û bi sîyasetê xo û hêzê xo xîretê dişmenî bişiknê. Iraqî ra heta Ewropa êyê ke xo rê vanê demokrat ganî hemkarê sûcanê faşîzmê AKP-MHPyî nêbê.

Newroze newe ra bîyayîş, roja newî, dîyayîşê wisarî ya. Ma sey têgêrayîşî û şarî Newroze Hemleya Azadîye de yew bikerê û ver bi serkewtişî rayîr a şinê. Ma venga pêro şarê xo û dostanê xo danê ke tewrê nê rayraşîyayîşî bibê, adirê Newroze gir bikerê û Hemleya Azadîye bivisnê serfîrazîye!''