Komîteya Merkezî ya PKKyî serkêşanê Têgêrayîşê Azadîye yê Kurdan ra Hakî Karer û serkêşanê Têgêrayîşê Şorişgêrî yê Tirkîya ra Îbrahîm Kaypakkaya serrgêra şehadetê înan de bi mesajêkî yad kerd.

Mesaj wina yo:

''Şorişgêro pîl embaz Hakî Karero ke Rayber Apoyî seba ci vatêne 'O sey ruhê min ê nimiteyî bi' 18ê gulana 1977î de Dîlok de amebi qirkerdene. Ma nika gulana 46. ya Roja Şehîdan û Menga Şehîdan de yê. Ma sey Têgêrayîşê Azadîye yê Kurdîstanî hê dekewenê Serra Şehîdan a 46. Ma gulana 46. de zî xeta şehîdan de şer kenê û ciwîyenê. Ma hê serkêşîya Xoverdayîşê Zap û Avaşînî de nê têkoşînê tarîxîyî de şehîdanê neweyan danê.

Nê esasî ser o sere de embaz Hakî Karerî ra heta Mizgîne Ronahî û Aysele Dogan pêro şehîdanê xo bi rêzdarî, heskerdiş û minetî yad kenê. Ma soz danê ke armanc û xeyalanê şehîdanê xo bîyarê ca. Ma do serra 46. de xeta şehîdan de serkêşîya Hakî Karerî de hîna pîlêrî ser bikewê. Ma venga pêro embazanê xo yê partîye, şarê xo û dostanê xo danê ke xeta Şehîdan û Rayberîye hol fam bikerê û bi serkewtişî bîyarê ca!

Rayber Apoyî vat 'PKK partîya şehîdan a.' Ey îfade kerd ke şehîdê ma erjê ma yê tewr pîlî yê, ma qetî xeta înan ra dûrî nêşorê, şehîdanê xo hol fam bikerê û eke ma wina bikerê serkewtişanê pîlan bivisnê destî.

Ma 45 serrî yo xeta Hakî Karerî de têkoşîn kerd û ciwîyê, ma her çîyî na xete ser de vistî destî, raştîye musayî, nasnameyê xo vist destî, serkêşîya partî, gerîla û raştîya xopawitişî aver berde, sere de şorişê ganîbîyayîşî û şorişê cinîyan pêro averşîyayîşê şorişî na xete ser de vistî destî, na xete ser de şer kerd û yew bîyî, vera dişmenê kurdan têkoşîn kerd. Hertim artêşa şehîdan ma rê fermandarîye kerde, hêz da ma. Ma her çi xêrê şehîdanê xo ra vist dest, pawit û aver berd.

Ma seba vîrameyîşê Hakî Karerî xoverdayîşo çekdar û partîbîyayîş da destpêkerdene. Ma seba vîrameyîşê Halîl Çavgunî Xoverdayîşê Hîlwanî aferna. Ma Xoverdayîşê Pîlî yê Zîndanî reyde serkêşîya Mazlûm Dogan, Ferhat Kutay û Çaran de Xoverdayîşo Pîl ê Rojeyê Mergî aferna. Ma xeta Hemleya 15ê Tebaxe xeta Mehmet Karasungur, Agît, Bêrîtan û Zîlanan de ser visnaye. Ma vera Komployê Mîyanneteweyî zî serkêşîya Halît Oral û Aynure Artan de xeta xoverdayîşî ya 'Şima nêeşkenê tîja ma tarî bikerê' ser kewtî.

Ma vera xeta îxanetî têkoşîno raştikên pê hêzê şehîdanê xo vet werte. Ma ewro serrgêra 25. ya Qirkerdişê Hewlêrî yê 16ê Gulana 1997î de yê. Ewro zî ganî raştîya PDKyî pê nê qirkerdişî bêra famkerdene. Bi na wesîle ma şehîdanê Qirkerdişê Hewlêrî şexsê Salîh, Hêlîne û Ozan de bi minet û heskerdişî yad kenê.

Ma na gulane de zî serkêşîya xoverdayîşê Zap û Avaşînî de vera faşîzmê AKP-MHPyî têkoşînêkê globalî kenê. Ma hedef kenê ke Hemleya Wextê Azadîye serra 50. de ser bivisnê. Gerîlayê ma yê çêrî hê her roje derbe danê artêşa îşxalkere ro. Ma bi na wesîle xoverdayîşê Zap û Avaşînî selam kenê û embazan rê serkewtiş wazenê. Ma şexsê Aysele Dogan û Mizgîne Ronahî de şehîdanê nê xoverdayîşî bi minet û hûrmetî yad kenê.

18ê gulana serrgêra şehadetê Îbrahîm Kaypakkayayî ya ke 1973 de Zîndanê Amedî de pê îşkence amebi qetilkerdene. Kaypakkaya serkêşanê Têgêrayîşê Şorişgêrî yê Tirkîya ra yew bi. Reyna serkêşanê Têgêrayîşê Şorişgêrî yê Tirkîya ra Denîz Gezmîş, Yusuf Aslan, Huseyîn Înan, Mahîr Çayan, Sînan Cemgîlî yo. 50 serrî yo şarê Tirkîya û Kurdîstanî rêçê nê serkeşan de xo ver danê. Nika HBDH keno ke nê têkoşînî ser bivisno. Ma bi na wesîle nê embazanê xo zî yad kenê û venga şaranê Tirkîya danê ke wa hîna bi xurtî wayîrê şehîdanê xo vejîyê, vera AKP-MHPyî têkoşînê Kurdîstanê Azadî û Tirkîyaya Demokratîke hîna bi xurtî bikerê.

 Raştîya Hakî Karerî cuya azade ya Kurdîstanî, bîyayîşê şorişgêr û welatperwerê raştikênî esas gêna. Kesê ke vera sîstemê camêrd, faşîst, şorişgêr û hişmendîya qirkere bi aktîfî têkoşîn nêkenê nêeşkenê Kurdîstan de bibê şorişgêr û welatperwer. No têkoşîn de bê yewîya têkoşînê demokrasî ya Tirkîya, Rojhelatê Mîyanênî û dinya nêbeno. Coka ganî ma 18ê Gulane Roja Şehîdan de na raştîye hol fam bikerê û bîyarê ca.

Ganî ma menga şehîdan de seba ke raştîye de yew bibê xîret bikerê, xeta şehîdan û Rayberîye de xo biercnê, rexneyanê xo bidê, vera faşîzmê AKP-MHPyî têkoşînêkê hîna pîl û raştî bikerê, şehîdgehan zîyaret bikerê, dersan bigêrê û seba armancanê şehîdan têkoşîn bikerê. Ganî ma tecrîdê Îmraliyî bişiknê, rejîmê AKP-MHPyî birijnê, Kurdîstanî azad, Tirkîya û Rojhelatê Mîyanênî zî demokratîke bikerê.

Nê esasî ser o ma serrgêra şehadetanê Hakî Karer û Îbrahîm Kaypakkayî de pêro şehîdanê nê 50 serran reyna bi rêzdarî û minetî yad kenê; ma venga pêro şarê xo yê welatperwerî, dostanê xo û embazanê xo danê ke raşrtîya şehîdan hol fam bikerê û nê esasî ser de her warî de têkoşînê rijnayîşî yê vera faşîzmê AKP-MHPyî bi xurtî bikerê.''