Komîteya Rayberdişî ya PKK'yî eşkerayîyêka nuştekîye weşane û semedê xurtkerdişê xoverdayîşî veng da. Eşkerayîye wina ya:

"Ma pê bawer ê ke sere de Kurdî û Erebî pêroyê şarê Vakur û Rojakewtena Sûrîye, pêroyê hêzê înan ê pawitişî, do çarçeweya vengdayîşê seferberîye yê Îdareyê Xoserî ya Demokratîke de reyna bi wezîfeyê pawitişî yê merdimîya azade tê bigêrê. Her cinîye û camêrdê ke eşkenî çek payda bikê bibê şervan, her keye bibo qerargeh, her kuçe bibo mewzîyêka şerî û bi nê hewayî do verba faşîstanê AKP-MHP'yî yê barbaran xoverdayîşêko serkewte bêro mojnayene, zîhnîyet û sîyasetê Tirkî yê mêtinger-qirker erdê Rojawanî de do bêro çinkerdene. Dewleta Tirkî ya mêtinger-qirkere pê paştgirewtiş û çekan ê dewletan ê DYA, Almanya, Rûsya û Çînî û NATO'yî dewrê 21'ine de bi hewayêkê eşkerayî Kurdan qir kena. Yanî sucêkê merdimîye kena û ê bînê zî hemparê nê sucî yê. Eşkera ya ke çaxo ke hêrişê Tirkî yo îşxalkar dest pê kerd ra şarê Vakur û Rojakewtena Sûrîye û hêzanê ma yê pawitişî YPG, YPJ û QSD bi mêrxasî xo ver danê. Xoverdayîşê Rojawanî û Rojakewtena Sûrîye yê tarîxî bibo xoverdayîşê rûmetî yê merdimîya demokratîke û zade. Ma xoverdayîşî  silam kenê, şehîdanê mêrxasan bi rêzdarî yad kenê û hêzanê xoverdayîşî rê serkewtiş wazenê. Serkewtiş ê şima bo.

Sere de Kurdê Rojawanî û şarê Vakur û Rojakewtena Sûrîye û şarê ma yê ke teberî de yê baş bizanê ke tarîx reyna ma rê wezîfeyê temsîlkarîya merdimîye û azadîye da. Çend zor û bedelê ci çeng giran bibo zî ma wezîfeyê tarîxî do bîyarê ca. Verê cû bi des hezaran şehîdan ma wezîfe bi rûmet û mêrxasî ard ca. Nika zî ser xeta Rayber Apoyî û şehîdanê ma yê mêrxasan ma do wezîfe sey Egîd û Zîlane bîyarê ca. Ma nêeşkenê xo bidê kişte. Seba ma têna rayîrêk esto; azadîye. Ganî ma xo vîr  ra mekê, têna xoverdayîş û xoverdayîşo teqez do serfîrazîye bîyaro.

Ma veng danê fermandar û şervanê HPG û YJA Starî ke hêzê xo yê şerî her ca de zêde bikê, çalakîyanê gerîlayî zêde bikê. Sere de ciwanan û cinîyan şarê mayo ke çar parçeyê Kurdistanî de û teberê welatî de yê, goş bidê vengê seferberîye yê Îdareyê Xoserî yê Vakur û Rojakewtena Sûrîye, dormeyê Xoverdayîşê Rojawanî de kom bibê. Verba îşxalkarîya Tirkî çalakîyanê xoverdayîşî geş bikê.

Ma bawer kenê ke sere de roşnvîrî û sîyasetmedarî pêroyê cîhanê Erebî do verba nê hêrişanê dewleta Tirkî ya îşxalkare wurzê payan ser, sere de hêzanê şorişgêr-demokratan ma veng danê pêroyê hêzan ê cîhanî yê şorişgêr-demokratan, pêroyê rêxistinanê cinîyan û ciwanan û pêroyê merdimîye ke şarê Vakur û Rojakewtena Sûrîye reyde ke verbaqirkerîye û îşxalkarîya Tirkî xo ver bidê, reyna dormeyê xoverdayîşo globalî de bibê yew! Zalim û barbarî do çin bibê, şervanê heqî û edaletî do ser bikewê."