Komîteya Rayberdişîya PKKyî bi wesîleya Newroze eşkerayîyêke daye.

Eşkerayîye wina ya:

''Ma  pê ruhê serkewtişê Garê û Hemleya Wextê Azadîye ya ke azadîya Rayberîye hedef kena Newrozêka newîye pêşwazî kenê. Nê bingeyî ser o ma verî ruhê serkewtişî yê Garê û ruhê 8ê Adare yê cinîyan gerîlayanê xo yê çêran selam kenê. Sere de yê Rayber Apoyî ma Newroza pêro şar, embazan û dostanê xo fîraz kenê. Ma şexsê şehîdê pîlî yê Newroze Mazlûm Doganî de pêro şehîdanê têkoşînê azadîuye bi hûrmet û minetî yad kenê. Ma na serra newîye ya Newroze de her kesî rê têkoşînê ci de serkewtiş wazenê.

Seke zanîyeno Newroze roşano tewr verên ê azadîye yo. Hîşmendîya Newroze pawitişê estbîyayîşê kurdan û waştişê azadîye de cayê girîngî de ya. Rayber Apo Newroza 1973î de bingeyê PKKyî naro û bi nê hawayî na hîşmendîye newe ra gandar kerde. Embaz Mazlûm Doganî Newroza 1982î de qirkerîya TCyî bin kerde û Xoverdayoxîya Kawayê Modernî afernaye. Bi nê hawayî gerîlayanê ma yê çêranê ke binê fermandarîya Mahsum Korkmazî de xo ver danê raştîya Newroze vete werte.

Ma nika serrgêra 48. ya destpêkê pîlî yê nê tarîxî de yê. Ma hê dekewenê serra 40. ya Xoverdayoxîya Kawayê Modernî. Ma sey partî, gerîlayan, hêzanê cinî û ciwanan, şar û hêzanê demokratîkan wazenê ke na serra 40. de tecrîdê Îmraliyî bişiknê, faşîzmê AKP-MHPyî birijnê, peynîya îşxalkerîya dewleta tirke bîyarê, Rayber Apo azad bikerê. Seba naye ma amade, qerardar, rêxistinkerde yê û ma do qetî ser bikewê.

Ma pê serkewtişê Garê dest pê serra Newroze kenê.Coka ma pê ruhê serkewtiş û xoverdayîşê Garê Newroza 2021î pêşwazî kenê. Eşkera yo gerîlayê ma yê çêrî  vera dîktatorîya AKP-MHPyî ya faşîst-qirkere pê ruhê xoverdayîş û serkewtişê Garê şer bikerê û qetî do ser bikewê. Nê esasî ser o ma reyna serkewtişê Garê fîraz kenê û Roşanê Azadîye Newroze fîraz kenê û gerîlayan rê serkewtiş wazenê.

Reyna eşkera yo ke şayîyê Newroze û çalakîyê 8ê Adare bîyî yew. Bi nê hawayî raştîya azadîye ya Newroze xeta azadîye ya cinîyan de şina. Hîkayeya azadîye ya cinîyan pê adirê azadîye yê Newroze resena serkewtişî. Cinîyî hîşmendî û coşê 8ê Adare û Newroze yewca de ciwîyenê, waran dekenê û benê rayberê azadîye. Nê esasî ser o ma ancî Şorişê Azadîye yê Cinîyan selam kenê

Dişmenê kurdan bi taybetî Şingal û Rojawan de peyê kay û provakasyonan de yê. Hetêkî ra nê dişmenî îtîfaqanê neweyan kenê hetêkê bînî ra zî teda û gefan wanenê. Şarê ma gef û qirkerdişan ra nêtersa û do nînan ra zî nêterso! Şarê ma yê Şingal û Rojawanî pê xoverdayîşê çêrî mojna ke ê do pêro kay û provakasyonan çin bikerê. Ma reyna xoverdayîşê Şingal û Rojawan selam kenê, Newroza înan fîraz kenê. Wa bizanê ke têgêrayîşê ma û şarê ma heya peyên hetê înan de yê.

Faşîzmê AKP-MHPyî Vakurê Kurdîstanî de û Tirkîya de seba fatisnayîşê şaran û bêvengkerdişê sîyasetê demokratîkî, terorê xo yê faşîst-qirkerî heta ci ra yeno ano ca. Îqtîdar kurdan rê qirkerdiş ferz keno, vera şaranê Tirkîya tedayêka faşîste ya topyekûne û terorî keno. Vera hêrişkerîya faşîst-qirkere şarê ma rayberîya cinî û ciwanan de bi çêrî xo ver dano û xîret keno ke hemleya ma ya Wextê Azadîye ser bivisno. Aseno no xoverdayîş do şayîyanê Newroze de vila bino û bireso astêka newîye ya berze. Ma Newroza şarê xo, şaranê Tirkîya, dostanê HBDHyî fîraz kenê û venga înan danê ke vera faşîzmê AKP-MHPyî têkoşînê xo yê şorişê yewbîyayeyî xeta serkewtişî de aver berê.

Verê çiman de yo ke têkoşînê azadîye yê şarê ma û hêzanê ma yê gerîlayan ê çêran sînoranê Kurdîstanî ra pêro dinya rê vila bîyo. Her cayê dinya de hêzê şorişgêr û demokratîkî paştî danê têkoşînê ma yê azadîye. Bi wesîleya Newroze ma têkoşînê pêro şaran ê bindestan û hêzanê demokratîk-şorişgêran fîraz kenê ke şar û têgêrayîşê ma reyde têkilîye nanê ro, paştî danê ma û têkoşînê hemparî yê vera faşîzmî pîl kenê.

Nê wextî de ke ma sey şar û têgêrayîşî Newrozêka newîye pêşwazî kenê vînenê ke welatê ma Kurdîstan û Rojhelatê Mîyanênî de şerê dinya yo 3. dewam keno û cigêrayîşê neweyî yê sîyasî dekewenê rojdem. Kifş o ke tay serdestî seba menfaatanê xo paştî danê îdareyê faşîstî yê AKP-MHPyî ke dişmenê kurdan o û qirkerd o. Nê seba nê menfaatan zêdêr hêrişê têgêrayîşê ma û şarê ma kenê û paştî danê qirkeranê faşîstan. Bi wesîleya Newroze ma reyna nê hêzan hîşyar kenê. Ganî bizanê ke ê pê paştdayîşê faşîzmê AKP-MHPyî û pê dişmenîya kurdan hînî nêeşkenê çîyêk bivisnê destî. Ma venga nê hêz û serdestan danê ke îrade û waştişê azadîye yê şarê ma rê hûrmet bikerê û  waştişê azadîye yê şarê ma bîyarê ca.

Hêzê faşîst-qirkerdî, efendîyê înan ê emperyalîstî û xizimkarê înan ê bebextî senî hêriş bikerê wa bikê pê têkoşînê azadîye yê kurdan nêeşkenê. Têkoşînê ma do nê şayîyanê Newroze de biresê asta tewr berze. Şarê ma yê Kurdîstanî û teberê welatî wa goş nêdê astengîyan, waranê Newroze pirr bikerê û Hemleya 'Wextê Azadîye'  ya seba azadîya Rayber poyî Newroze de biresnê asta tewr berze. Ma pê na bawerîye reyna Newroza pêro kesanê ke seba azadîye têkoşîn kenê fîraz kenê, sere de cinî û ciwanî venga pêro şarê ma û dostanê ma danê e her ca de tewrê Newroze bibê, pê ruhê serkewtişê Garê û 8ê Adare Newroze bi coşî fîraz bikerê.''