Komîteya Têkilîyanê Teberî ya PKKyî eşkerayîyêke daye û îfade kerd ke statuyê Başûrê Kurdîstanî, cuya azade û demokratîke pê bêvengîya vera îşxalê TCyî ney pê xoverdayîşê vera ci yenê caardene û venga pêro hêzan da ke tewrê xoverdayîşî bibê.

Eşkerayîye wina ya:

''Hêrişê dewleta tirke ya qirkere, faşîste û îşxalkere yê vera gerîlayanê azadîye, şar û erdê kurdî dewam kenê. Ne dewleta tirke ne zî hemkarê ci nê hêrişan nimnenê. Şexsê gerîlayanê azadîye yê Kurdîstanî de yewîya neteweyî, xoza, ziwan, kultur û şarê Kurdîstanî yenê hedefkerdene. Coka gerîlayî pê xoverdayîşê fedayî kenê ke erjanê esasan ê şarê ma û rûmetê şarê ma yê neteweyî bipawê.

Dewleta tirka ke vera gerîlayan bin kewte û nêeşkaye operasyonanê îşxalî îdare bikeera 5ê hezîrana 2021î de hêrişê Mexmûrî kerd ke Mexmûr binê pawitişê Neteweyan ê Yewbîyayeyan (NY) û dewleta Iraqî de yo. Iraq û Neteweyê Yewbîyayeyê ke vera hêrişanê Erdogan û dewleta tirke bêveng ê rayîr danê îşxalî û nê hêrişî de zî mesuldarîya ci esta. Goreyê kamyew huqûqî teyarayê şerî û SÎHAyê dewleta tirke hasmênê kampa multecîyan de gêrenê? Goreyê kamyew huqûqê mîyanneteweyî no warê hewayî seba hêrişê vera sivîlan dîyeno şuxilnayene? Mumkîn nîyo ke bêdestûrê nê hêzan dewleta tirke warê hewayî bişuxilna û hêrişê Mexmûrî bikera. Armancê nê hêrişanê ke multecîyan û zereyê kampa Mexmûrî hedef kenê zanîyeno. Ê wazenê bimojnê ke kurdan her ca de do hedef bikerê û têkoşîn û xoverdayîşê şarê ma bin bikerê. Şarê Mexmûrî 1993 ra nata vera hêrişanê dewleta tirke Botanî ra heta Mexmûrî  her roja xo pê xoverdayîş û têkoşînî derbaz keno. Coka nê hêrişî parçeyêkê planê qirkerdişî yê dewleta tirke yê û do bin bikewê. Mesuldarîya NY, Yewîya Ewropa, Iraq, PDK û hukmatê Herêma Kurdîstanî ya ke hêrişê vera Mexmûrî vindarnê. Ma venga ê hêzanê ke vera nê hêrişan bêveng ê danê ke wayîrê wezîfeyanê xo vejîyê. Mexmûr rûmetê Kurdîstanî yo û kelaya xoverdayîşî ya. Bi na wesîle ma reyna hêrişê vera Mexmûrî bi tûjî şermezar kenê.

5ê hezîrana 2021î de serê sibayî qestî ra xeberêke pêşkêşê rayaumumîye ameye kerdene. Goreyê xebere grûba hêzanê Zerevanî ya PDKyî waşto debikewa Metîna û hêzanê ma HPGyî a hedef kerda. Reyna 8ê hezîrana 2021î de xebera ke vatêne pêşmergeyêk ameyo pirodayene hêzanê HPGyî rê ame malkerdene. Nê xeberî raşt nîyê, bi temamî manîpulasyon ê û armancê înan meşrûkerdişê îşxalê dewleta tirke yo, vergirewtişê binkewtişê dewleta tirke yo. Ma nê pêro xeber û îdîayanê bêbingeyan şermezar kenê. Rixmo ke HPGyî eşkera kerd ke eleqeyê înan bi nê serebûtan çin o PDKyî û medyaya ci bi israrî serebûtî eştî milê gerîlayan ser û no têgêrayîşê înan plankerde yo.

Hêzê gerîlayan 46 rojî yo vera dewleta tirke ya faşîste bi çêrî û serkewteyî xo ver danê û artêşa tirke arde asta binkewtişî. Nê prosesî de ke pêro şarê ma yê Başûrî, kurdî û rayaumûmîya dinya vera îşxalê dewleta tirke tewirêkê xurtî gênê PDK qestî ra zûran û xeberanê zûrayînan vila keno. Balkêş o ke nê zûr û xeberî dima ke PDK û dewleta tirke Hewlêr de kom bi ameyî kerdene. Gerîlayî dewleta tirka ke game bi game Başûr îşxal kena hedef kenê û bi des serran o vera nê hêrişanê kolonyalîstan xoverdayîşê neteweyî anê ca.  Hêzê ke vera dewleta tirke tewir nêgênê û xover nêdanê pozîsyonê şerî yê gerîlayan ra firsend vînenê û waranê gerîlayan gênê binê ablûqa. No nêno qebulkerdene. PDK hem îşxalê TCyî meşrû keno hem zî pê vergirewtişê têkoşînê şar û hêzanê sîyasîyan îşxalê tirkan meşrû keno. Gereka PDK nê hêzanê xo Metîna û Berbizîna ra apey bianco.

Statuyê Başûrê Kurdîstanî, cuya azade û demokratîke pê bêvengîya vera îşxalê TCyî ney pê xoverdayîşê vera ci yenê caardene. No wezîfe keweno milê Parlamentoya Başûrê Kurdîstanî. Gereka Parlamentoya Başûrê Kurdîstanî pê hîşmendîya welatperwerîya kurdan biewna mesele û venga pêro partîyanê Başûrî bida ke vera îşxalî xo ver bidê. Reyna ma venga nê dormeyan danê ke xîretanê winasênan xo dûrî bigêrê ke do destê gerîlayan qels bikerê, destê îşxalkeran bihêz bikerê û yewîya neteweyîye bikerê binê tehlukeyî.

Hêzê gerîlayan vera hêrişanê faşîstan şerê cuye yê rûmetîn û azadî kenê. Ma venga pêro hêzanê kurdîstanîyan danê ke nê xoverdayîşê tarîxî pîl bikerê, hetê gerîlayan de ca bigêrê û pîya îşxalî bin bikerê.''