Komîteya Rayberdişî ya PKK'yî mesajê xo de vat şarê Rojakewtena Mîyanêne û merdimîye kewtê Newrozêka newî; Mucadeleyê Azadîya Kurdistanî ke bi serkêşîya Kawayanê hemdeman aver şino, şaran û merdimîye faşîzmê DAÎŞ û AKP-MHP’yî yê ke Dehaqê ewroyên ê ra paweno, bi nê hawayî efsaneyo 2631 serre sey heqîqeto tewr xurt ê ewroyî newe ra xo ramojneno. 

Komîteya Rayberdişî ya PKK'yî eşkerayîya ke bi wesîleya Roşanê Newroze dabî de ard ziwan ke îqtîdaro faşîst ê AKP-MHP’yî se keno wa bikero do nêeşko vernîya binkewtiş û rijîyayîşê xo bigêro û vat ê do hemverê têgêrayîşê azadîye de şirê selika çopî ya tarîxî û gama ke ê na rastî vînenê zî hîna zaf tersenê.   Eşkerayîya Komîteya Rayberdişî wina ya:

HEMVERÊ DEHAQANÊ EWROYÊNAN DE

“Şarê Rojakewtena Mîyanêne û merdimîye kewtê Newrozêka newî. Mucadeleyê Azadîya Kurdistanî ke bi serkêşîya Kawayanê hemdeman aver şino, şaran û merdimîye faşîzmê DAÎŞ û AKP-MHP’yî yê ke Dehaqê ewroyên ê ra paweno û xelisneno. Bi nê hawayî efsaneyo 2631 serre sey heqîqeto tewr xurt ê ewroyî newe ra beno gane. Rastîya yewîye, xoverdayîş û serkewtişî ya Roşanê Azadîye yo tewr kan ê merdimîye Newroze, mucadeleyê ewroyêne de resena manaya xo ya tewr xurte.  Afernayoxê Newroze Kawayê Asinkarî ra heta Kawayo Hemdem Mazlûm Doganî û Zekîye Alkane heme şehîdê ma mucadeleyê azadîye yê şarê ma de ciwîyenê.

MA NEWROZE MANAYA CI YA RASTEKÎNE DE CIWÎYENÊ

Ma sey têgêrayîş û şar  bi hemleya xoverdayîşî ya ‘Ma tecrîdî bişiknê, faşîzmî birijnê û Kurdistanî azad bikerê’ kewenê serra 2631. ya Newroze.  Xoverdayîşê Grevê Vêşanîye yo Pîl o ke bi serkêşîya hemsereka Kongreya Cimatê Demokratîkî (KCD) û parlamentera HDP’yî ya Colemêrgî Leyla Guvene dewam keno roja xo ya 130. Ra ravêrto. Dorê grevanê vêşanîye de û bi serkêşîya hêzanê ma yê gerîla yê qehremanan de xoverdayîşo antî-faşîst o tarîxî yê şarê ma û hêzanê demokratîkan dewam keno. Bi mucadeleyê topyekunî yê azadîye ke bi  hişmendî, bawerî û îradeyî aver şino, ma Newroze manaya ci ya tewr rastekîne de ciwîyenê.

DO SERKEWTIŞÊ AZADÎYE RÊ ŞAHIDÎ BIKERO

Bingeyê nînan de sere de yê Rayber Apoyî ma Roşanê Newroze yê Azadîye şexsê Leyla Guvene û Nasir Yagizî de heme xoverdayoxanê grevê vêşanîye, hemrayanê partîye, şarê ma yê welatperwerî, hêzanê demokratîkan û merdimîye pîroz kenê, xoverdayîşê tarîxîyî silam kenê û serra newî ya Newroze de serkewtiş wazenê.  Ma şexsê Şehîdanê Newroze yê pîlan hemra Mazlûm Dogan, Mahsûm Korkmaz, Zekîye Alkane, Rahşan Demîrele, Ronahî û Berîvane de heme şehîdanê xo yê azadîye bi hurmet û minet bi vîr anê.  Ma sozê bi serfînayîşê amacanê înan danê û sozê xo yê ciwînayîşê vîrameyîşanê înan kenê newe. Ma bawer kenê ke na serra Newroze do bibo şahidê serkewtişanê tewr girdan ê azadîye ra yewî.

KOLONYALÎZM TERORÊ FAŞÎSTÎ VILA KENO

Şerê Dinya yo Hîrêyin ke Rojakewtena Mîyanêne de yeno ciwîyayene keweno serra xo ya 30’ine. Bêguman beşo tewr manîdar û muhîm ê nê şerî mucadeleyo ke Kurdistan de hemverê faşîzmê DAÎŞ û AKP-MHP’yî de yeno dayene yo. Zihnîyet û sîyaseto ke kolonyalîzmî û qirkerdişî ferz keno xo Rojakewtena Mîyanêne û heme cayanê dinya de sey terorê faşîstî û qirkerdişî pratîk de ramojneno. Zaf eşkera yo ke binê kolonyalîstîye de û qirkerdişî de pêgirewtişê Kurdistanî, beno sebeb ke sere de Tirkîya û Rojakewtena Mîyanêne de no teror û qirkerdişê faşîstî hemeyê dinya de zî bibo vila. No zî xusûsen xo sîstemê îşkence û tecrîdî yê Îmrali de xo ramojneno. Naye ra her keso ke birastî hemverê zext, teror û qirkerdişanê faşîstan de yo ganî hemverê serdestîya kolonyalîst û qirkerdoxe ke Kurdistan de ya û hemverê sîstemê tecrîd û îşkenceyî yê Îmrali de vejîyo.

MA HER KESÎ DAWETÊ VÎNAYÎŞÊ RASTÎYE KENÊ

Ma sey şaro Kurd û Têgêrayîşê Azadîye, hemverê faşîzmê DAÎŞ û AKP-MHP’yî yê ke Dehaqê zalimî yê ewroyî yê bi dayîşê her tewir bedelî mucadeleyêkê tarîxîyî yê azadîye danê. Ma Rayraşîyayîşê Merdimîya Azade ke hemverê gêjîya modernîteya kapîtalîste û zihnîyetê faşîstî yê qirkerdoxî de merdimîye paweno dayo destpêkerdene. Ma danê faşîzmê AKP-MHP’yî ro û bi nê hawayî çetekarîya faşîste ya sey DAÎŞ’î kenê zehîf, seke nimûneyê Vakur-Rojakewtena Sûrîye de yeno dîyene bi pakkerdişê çetekarîya faşîste ya DAÎŞ’î ma cehd kenê ke hemeyê merdimîye belayê teror û qirkerdişê faşîstî ra bixelisnê.  Ganî her kes na rastî bivîno û biedalet tê bigêro. Nê bingeyî de ma her keso ke girêdayeyê ercanê demokratîkan o dawet kenê ke na rastî bivîno, hemverê qirkerdişo ke Kurdistan de yeno kerdene vejîyo, rastîya şarî ya Kurdan û heqanê înan ê demokratîkan nas bikero.

DO NÊEŞKO VERNÎYA RIJÎYAYÎŞ Û BINKEWTIŞÊ XO BIGÊRO

Ma sey têgêrayîş û şar Newroza 2631. xeta serkewtişî de bi xoverdayîşêkê tarîxî û xurtî pêşwazî kenê. No hal şexsê Îdareyê AKP-MHP’yî de zihnîyet û sîyasetê faşîst-qirkerdoxî adeta keno gêj, tu qaydeyê exlaq û huqûqî nêşinaseno, her roje bi desan merdiman qetl keno û erzeno zîndanan, sîstemê îşkence û tecrîdî yê Îmraliyî adeta açarnayo terzêkê îdareyî û nê hemeyê Tirkîya ser o ferz keno û sey paşayanê xo yê Îttîhat û Terakkîyan keno ke şarê ma serê erdanê înan ê des hezaran serrî ra bikero teber. La se keno wa bikero faydeyê tersî ecelî rê çinyo, nêeşkeno vernîya binkewtiş û rijîyayîşê xo bigêro.

MUCADELE BENO XURT Û PÎL

Zaf eşkera yeno dîyene ke çende hêriş û qirkerdişo faşîst beno vêşî mucadeleyê şarê ma û dostanê ma yê Kurdistanî û teberê welatî zî hende beno xurt û pîl. Şarê ma yê Vakurî pîya bi şar û hêzanê demokratîkan ê Tirkîya xo amade keno ke weçînitişê cayîyî yê 31’ê Adare de dersêka newî bido faşîzmê AKP-MHP’yî. Şarê ma yê Rojawanî sere de Ereban dir, şaranê Sûrîye dir bîyê yew çetekarîya DAÎŞ’î kenê binê erdê tarîxî û sîstemê xo yê pawitişê azadî aferneno.  Şarê ma yê Başûrî bi Serewedartişê Şêladizê hemverê hêrişkarîya faşîste ya AKP-MHP’yî de û îşxalê Tirkîya de hêrsê xo bi hawayêkê zelalî ramot.  Şarê ma yê Rojakewtene zî paştî dano xoverdayîşanê heme perçeyan û goreyê nê ra xo amade keno. Şarê ma û dostê ma yê teberê welatî zî bi xoverdayîşê xo yê cesûr û fedakarî hemleya ma ya serkewtişî rê serkêşîye kenê.

SERRA NEWROZ A NEWÎ DO BI SERKEWTIŞÎ BÊRO TACÎDARKERDENE

Ma sey şar û Têgêrayîş Newroza 2631’ine  Nê bingeyî de pêşwazî kenê; manaya ci ya azadî, yewîye, xoverdayîş û serkewtişî ciwîyenê. Her ca de bi serkêşîya cinî û ciwanan çalakîyê azadîye virazênê. Bi serkêşîya grevanê vêşanîye hemleya xoverdayîşî ya ‘Ma tecrîdî bişiknê, faşîzmî birijnê û Kurdistanî azad bikerê’ bena pîle û ver bi serkewtişî şina. Qehremanîya Mazlûm û Egîdî, xeta xoverdayîş û serkewtişî ya 14’ê Temmuze rayîr dana nê rayraşîyayîşê tarîxîyî rê. Eşkera yo ke pîya bi pîrozkerdişanê Newroze do no xoverdayîş vejîyo tîtikî û serra newî ya Newroze de bi serkewtişî bêro tacîdarkerdene.

MA BI PIRKERDIŞÊ MEYDANAN, KUÇEYAN PÎROZ BIKERÊ

Nê bingeyî de ma ancî Newroza her kesî pîroz kenê, sere de cinî û ciwanî ma veng danê heme şar û dostanê xo ke hemleya xoverdayîşî ya ‘Ma tecrîdî bişiknê, faşîzmî birijnê û Kurdistanî azad bikerê’ ke bi serkêşîya Leyla Guvene amîbî destpêkerdene rê bi hawayêkê hîna xurtî wayîr vejîyê, çalakîyanê xo yê azadîye hîna bikerê rengên, hemleya ma xeta qehremanîye ya Mazlûm û Mahsûmî de rayra berê û bi hawayêkê qetî serkewtişî bi dest bifînê; Roşanê Newroze yê Azadîye bi coşêkê pîlî, bi pirkerdişê meydan û kuçeyan pîroz bikerê!”