Komîteya Rayberdişî ya PKKyî bi wesîleya serrgêra 45. ya ronîyayîşê PKKyî eşkerayîyêke daye. Eşkerayîye wina ya:

''Ma serrgêra 45. ya ronîyayîşê serkêşê ma yê azadîye PKK de yê. Ma bingeyê Kampanyaya Azadîye ya Mîyanneteweyîye bi xurtî û qerardarî dest pê serra 46. kenê. Ma bi bawer ê ke serra 46. de çarçewa azadkerdişê Rayber Apoyî de destkewteyanê pîlan bivisnê destî.

Ma roşanê partîye 27ê Teşrîna Peyêne Rayber Apoyî rê, embazan rê, şarê ma û dostanê ma rê fîraz kenê. Embaz Hakî Karerî ra heta Leyla, Axîne, Rojhat û Erdalî ma pêro şehîdanê xo b hûrmet û minetî yad kenê. Serra 46. ya PKKyî de ma xeta Rayberîye û şehîdan de bi xurtî şer bikerê û ser bikewê.

Seke zanîyeno ke Rayber Apo û PKK wexto ke şarê kurdî raştê qirkerdişî ameyêne weriştbî payan ser. PKK bi fikranê Rayber Apoyî, fedakarîya şarê kurdî, serkêşîya cinî û ciwanan de aver şi. PKKyî bi nê hawayî her çi bi bedelanê pîlan vist destî. Serra 45. ya ronîyayîşî bîye serra têkoşîn û destkewteyan.

Her kes hînî qebul keno û zaneno ke şarê kurdî tesîrê qirkerdişê kulturelî bi têkoşînê Rayber Apoyî û PKKyî şikna, her çi xêrê têkoşînê Rayber Apoyî û PKKyî ra vist destî. Bi têkoşînê xo PKKyî kurdayetîya azade afernaye. Kurdîstan hînî kelaya kanwazîye ney kelaya averwazî ya. Komelê kurdan bi îdeolojîya azadîye ya Apogîrî xo zanaye kerd, dest pê şerê tewr manadarî kerd. 

Têkoşînê serra 45. yê PKKyî nê serebût û averşîyayîşî resnayî lewe. Xoverdayîşê gerîlayan sere de Zap, Avaşîn û Metîna de,  çar parçeyanê Kurdîstanî û teberê welatî de têkoşînê şarê ma û dostanê ma derbê giranî da faşîzmê AKP-MHPyî ro. Xoverdayîşê Şerê Şarî yê Şorişgêrî, têkoşînê vera tecrîdê Îmraliyî û têkoşînê seba azadîya Rayberîye morê xo da sîyasetê mîyanneteweyî û neteweyîyî ro. Têgêrayîşê azadîye yê cinîyan ê Kurdîstanî xeta Jin, Jiyan, azadî de tesîrê pêro dinya kerd. Têgêrayîşê Ciwananê Kurdan vera modernîteya kapîtalîste serkêşîya ciwananê mîyanneteweyîyan kerde.

Ma nê xoverdayîşê gerîlayan, cinî û ciwanan selam kenê. Ma her kesî rê serkewtiş wazenê û şehîdanê xo yê qehremanan ancî bi rêzî yad kenê. Ma pê bawer ê ke Xoverdayîşê Azadîye serra 46. de do xurtêr bibo, ser bikewo.

Ma bingeyê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de dest pê serra 46. kenê. Nika her ca de û her roje çalakîyê seba azadîya Rayber Apoyî yenê kerdene. Her rengî ra, her cînsîyetî ra, her netewe û beşanê komelî ra merdimê demokratîkî û azadîgîrî tewrê na hemle benê û têkoşînêkê pîlî kenê. No têkoşîno pîlo ke dormeyê azadîya Rayber Apoyî û tesdîqê paradîgmaya demokratîke, ekolojîke û azadîgîra cinîyan de aver şino, mojneno ke 'Têgêrayîşêkê Demokrasî yê Mîyanneteweyîyî' dest pêkerdo.

Eşkera yo ke serra 46. ya PKKyî bingeyê na hemle de bi çalakîyan derbaz biba. Têgêrayîşê ma, şarê ma, dostê ma vera dîktatorîya faşîst-qirkere ya Erdoganî û Îtîfaqê Cumhurî do nê bingeyî de ser bikewê. Bi têkoşînê serra 45. kokê sîstemê faşîst-qirkerî ameyî lerznayene û bi têkoşînê serra 46. zî do no sîstem bêro rijnayene. Na çarçewe de ma venga dostanê xo, şarê xo yê welatperwerî û dostanê xo danê ke Hemleya Azadîye bi raştî fam bikerê, destek bidê ci, xurtêr bikerê û bi metodanê afernayoxan têkoşînî ser bivisnê.

Armancê ma yê serra 46. qerardarî û îradeyê ma yê serkewtişî nê esasî ser ê. Ma do bingeyê Hemleya Azadîye de azadîya Rayber Apoyî bîyarê ca, meseleya kurdan çareser bikerê. Şarê Kurdîstanî qetî destûr nêdo ke sey şarê Gazze bibo qurbanê şerî û menfaetanê herêmî û mîyanneteweyîyan. Vera lîberalîzmê modernîteya kapîtalîste her ca de ma têkoşînêkê xurtî û bitesîrî bikerê. 

Eşkera yo ke serra 46. de rayîrê ma akerde yo, verê ma roşnî yo. Dîyar o ke ma kamca de çita bikerê. O çax ma bi serra 46. nê raştîyan hol fam bikerê, Paradîgmaya Azadîye ya Apogîre bi xurtî bîyarê ca, tewrê Hemleya Azadîye ya Mîyanneteweyîye bibê û her ca de na hemle ser bivisnê! Ma serra 46. ya PKKyî bikerê serra azadîya Rayber Apoyî û çareserîya meseleya kurdan!

Nê esasî ser o ma 27ê Teşrîna Peyên Roşanê Partîye Rayber Apoyî rê, pêro embazan rê, şarê xo û dostanê xo rê ancî fîraz kenê. Ma venga pêro kesan danê ke Roja Ronîyayîşê PKKyî bi çalakîyanê cîyayan û bi coşêkê pîlî, bi Hemleya Azadîye ya Mîyanneteweyîye fîraz bikerê!

Bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ma serdestîya camêrdan şermezar kenê. Ma pê bawer ê ke têkoşînê vera şîdetî do bêro xurtkerdene û Şorişê Cinîyan bêro caardene. Nê esasî ser o ma veng danê ke wa camêrdî tewrê çalakîyanê cinîyan bibê. Ma bingeyê Şorişê Azadîye yê Cinîyan de pêro çalakîyan selam kenê, serkewtişî wazenê!''