Polîsanê Tirkî verê beranê rexistinanê HDP'yî yê Amedî de dorme girewt, HDP'yîjan waşt ke verba hêrişanê Rojawanî eşkerayîye bidê. Polîsan hêriş kerd serê çalakgeran û wekîle Salîha Aydenîze zî derb kerde.
Rêxistinanê HDP'yî yê Sûr, Yenîşehîr, Pêyas û Rezanê verba hêrişê Tirkîya yê serê şaristananê Rojawanî waşt eşkerayîyêka çapemenîye bikê. Polîsanê Tirkî bi wesayîtanê zirxinan verê beranê bînayanê HDP'yî de dorme girewt. Polîsan semedê "hetê walîtîye ra qedexeyê çalakîyan ê şaristanan" ra destûr nêda HDP eşkerayîye bike.
HDP'yîjan da zanayene ke viraştişê çalakîyan ê haştîyaneyan heqêkê qanûnê bingêyînî yo û dormegirewtişê bînaya înan nêno qebulkerdene û waşt ke polîsî vila bibê. Qezaya Baxlarî de polîsan bi gazê îsotî û jopan hêrişê serê HDP'yîjan kerd û ê derb kerdî. Hêriş de Parlamentera HDP'yî ya Amedî Salîha Aydenîz xo ra şîya û bi ambulans ameye berdene bi nêweşxaney. Polîsan bi jop û sîperanê xo HDP'yîjan rê dame naye ro û nêverde ke eşkerayîye bidê û dekewtiş û vejîyayîşê bînaye qedexe kerd. Polîsan berê bînayanê HDP'yî yê Sûr, Pêyas û Yenîşehîrî zî HDP'yîjan rê padayî û destûr nêda eşkerayîye bidê. Parlamenterê HDP'yîjan zî tede verê bînayanê HDP'yî de vindertişê şarî dewam keno.
