Zanyaro swîsreyij, pawitoxê heqanê merdiman û sîyasetmedar Pr. Dr. Franco Cavalli averşîyayîşê Sûrîya ANFyî rê erjnayî.

Prof. Cavallîyî vîst vîrî ke rejîmê Sûrîye yo newe nizdî ra pabesteyê Tirkîya yo û heta mengêke verê sey DAÎŞî sey terorîstî ameyêne naskerdene û nê vatî: ''Ewro nê kesî ziwanê nermî şuxulnenê la ez înan ra bawer nêkena. Çîyo tewr tehlukeyin o yo ke na rewşe tesîrê hetkaranê DAÎŞî zafêr kerd. Reyna averşîyayîşanê neweyan ê Sûrîye hêzê Erdogan zî zêdîna ke tim wazeno her çîyo ke Rojawan de ameyo afernayene çîn bikero.''

Prof. Cavallîyî bale ante ser ke Sûrîye de têna kurdî semedê demokrasîyî têkişîn kenê û wina vat: ''Ez pê bawer nîya ke rejîmo newe demokratîk bo û heqê cinîyan û şaran bipawo. Coka ez zaf qesawet kena. 10 serranê peyênan de mi hende qesawet nêkerd. Na rewşe bitaybetî tehlukeyin a. Çunke Erdoganî nîyetê xo yê xirabî verî eşkera kerdbî. Beno ke Erdogan vera kurdan senî tirkan vera ermenîyan kerd, qirkerdişêk bikero. Nê semedî ra raşta zî ez zaf qesawt kena''.

Prof. Cavallîyî îfade kerd ke rojawan seba ke Rojhelatê Mîyanênî de hêzo xo bipawo her rayîrî şuxulneno û gama ke hewce bikero qirkerdan zî paweno û wina vat: ''Rojawanî xo vîra kerdo rejîmê Sûrîye kam o û vano her çî rayîr de yo. Rojawan verî menfeatê xo fîkîryeno.''

Prof. Cavallîyî  veng da heme demokratanê dinya ke wa Rojawanî bipawê û wina vat: ''Seba ke haştîye û demokrasî bêrê Rojhelatê Mîyanênî têna hêvî modelê Rojawanî yo. Ûca her kes, heme şarî, cinî, camêrdî wayîrê heqanê sey yewbînan ê. Kurdan binê şertanê zehmetan de awanîya demokratîke na ro ke semedê dinya nimûne ya. Ganî heme hêzê demokratîkî semedê xelisnayîşê sîstemê Rojawanî dahîna zaf cehd bikerê. Semedê pawitişê Rojawanî ganî her waxtî zafêr têkoşîn bêro kerdene.''