Namzedanê Yewîya Hêzî ya Şorişgêre ya Dêrsimî Komela Elewîyan a Demokratîke (DAD) de projeyê xo yê bajarî dayî nasdayene. Namzedanê hemşaredarîye yê bajarî ya pîya temsîlkarê organîzasyonanê sivîlan û xeylî hemwelatijî tewrê aktîvîteye bîyî.

Temsîlkaranê yewîya hêzî  ra Ekber Kaya ke qiseykerdişê akerdişî kerd ard ziwan ke ê do sey yewîya hêzî şaredarîye ke hetê qeyûman ra ameyî xespkerdene pêser bigîrê û va, ‘‘31’ê Adare tena nênê manaya weçînayîşê şaredarîyan, hemen wextî hemverê  rejîmê yewmerdimî de xoverdayîşê pawitişê demokrasîyî yo. Dima ra zî namzedanê hemşaredarîye yê Yewîya Hêzî ya Şorişgêre ya Dêrsimî Nûrşat Yeşîle û Hidir Demîrî projeyê xo dayê nasdayene. Nûrşat Yeşîlê şexsê Leyla Guvene ya ke 128 rojî yo grevê vêşanîye de ya, xoverdayoxê grevê vêşanîye silam kerdî.

Projeyê namzedanê  hemşaredarîye yê Yewîya Hêzî ya Şorişgêre ya Dêrsimî  ra tayî wina yê: Xizmeto seypê  do bêro dayene. Meclîsê bajar, mehle, dewe, cinî, û ciwananan do bêrî xurtkerdene û heme qerarî bi îradeyê şarî bêrî girewtene. Şaredarîyan de cinîyî do seypê bêrî temslîkerdene û vernîya polîtîkaya cînsî bêro girewtene. Seba averberdişê heywankarîye û citkarîye kooparatîfî do bêrî ronayene û bazarê şarî bêrî raameyene. Seba wayîrvejîyayîşê xoza û kulturî do game pêt bêrî eştene. Şarî rê do xizmetê weşîye bêro dayene û banê meymanan ê şaredarîye do bêro akerdene.Merkezê Mişewre yê Cinîyan do reyna bêrî akerdene û Kooperatîvê Cinîya Azade do bêrî ronayene. Semedê ziwanê maye do kreşê bê destmiz bêrê akerdene.  Vera şîdetê serê cinîyan xetê Alo şîddet  do bêro ronayene. Merkezê Kurlturî  yo ke verê qeyûmî projeyê ci qedîyabi  do bêro înşakerdene. Muzeyê Hafizaya-38 ê Dêrsimî do bêro viraştene. Festîvala  Kultur û Xoza ya Munzurî do qeyûm ra pêser bêro girewtene. Maddeyê heşberdoxî yo ke dewlete seba ke ciwanan nasnameyê înan ra raqilnê dana şuxulnayene do vernîya ci bêro girewtene, seba naye gamê pêt bêrê eştene. Do destur nêdîyo Baraj, HES û talankerdişê Dêrsimî.