Fermandarîya Qerargehê MPŞ’yî yew beyanato nuştekî pare kerd. MPŞ’yî beyanatê xo de wina va: “Bager Bedlîs ( Fatîh Ozden) û 3 embazê ci, 1’ê Êlule 2018 de; Ronya Qerse û Zelal Newale zî 17’ê Hezîrane 2018 de şehit kewtî. Şexsê Endamê Konseyê Fermandarîya HPG’yî û Fermandarê Eyaletê Cîloyî Bager Betlîsî de, ma pêro şehîdanê xo yê qehremanan yad kenê, soz danê înan ke ma do mucadeleyê înan hîna bikê pêt.“

Beyanatê MPŞ’yî wina dewam kerd:

“Mucadeleyê Azadîya Kurdistanî, bi serkêşîya şehîdanê qehremanan demêko zaf muhîmî ra derbaz beno û ewro serkewtişî rê hîna nêzdîyo. Ewro serkewtiş her çiqas ke nêzdî biaso zî, proses zaf girano. Şarê ma wextêko winasî de azadîya xo ra wet çiyêk nêwazeno û her wextî ra hîna zêde girêdayîyê mucadeleyî yo. Erdê Kurdistanî hem renginîya wisarî rê, hem zî xoverdayîşanê bêemsalan rê şahadîye keno. Bêguman xoverdayîşî seba ke bibê serkewte bedelan wazenê û qehremanê ma zî qet xo pey de nêgênê û seba mucadeleyê azadîya şarê ma xo feda kenê. No zî bedelo tewr pîl o.

Heval Bager serra 1970’î de qezaya Bedlîsî Elcewaz de ameyo dinyaye. Serra 1991’î de unîversîte ca verdaya û Amed de beşdarê refê gerîllayan bîyo. Herêmanê Amed û Xerzanî de vera dişmenî mucadeleyêko bêemsal dano û reyna Warê Pawitişî yê Medya de zî nê mucadeleyê xo domneno. Heval Bager bi vindertiş, cesaret û disurtîya xo mabenê gerîllayan de kedêka pîle daya û xêza Rayber Apoyî ra qet nêvejîyayo û bi hîsêko xorîn girêdayîyê hevalan û şarê xo bi.  

Xeylî çalakî û pêkewtişan de bi dolîman birîndar kewto û her dolîme reyna warişto payan ser û muadeleyê azadîya şarê xo ra qet nêvisîyayo. Heval Bager 3 serranê peyênan de Fermandarê Herêma Zagrosî  bi û na herême de derbeyê pîlî dayî bi dişmenî ro. Heval Bager wayîrê zanayîş û tecrubeyê xorî bi û bi nê tecrubeyanê xo bi serkêş û operasyonanê krîtîkan ê serkewteyan de ca girewt.

Bi heskerdiş û bi keda xo, mabênê gerîllayan de sey nimûne ameyo dîyayene û şehadetê ey, ma rê vîndbîyayîşêko pîl o. Heval Bager do mucadeleyê ma de biciwîyo û bi taybetî zî hetê şarê Xerzanî ra her tim bêro yadkerdene û destanê ke ey bi mucadele nuştê do biresê neslê neweyî.

Hevala Ronya Qezaya Dîgorî ya Qersî de serra 1981’î de, yew keyeyo welatparez de ameya dinyaye. Ronya hîna ke domana sivike bîya faşîzmê TC’yî şinasnayo û metropolanê Tirkîya de rewşa şarê Kurdî baş fehm kerda û naye ser beşdarê mucadeleyî bîya. Ronya xeylî xebatanê sîyasî de ca girewto û serra 2003’yî de beşdarê gerîlla bîya. Heval Ronya her tim cepheyê tewr verî de şer kerdo û Herêma Erziromî de derbeyê zaf pîlî dayê dişmenî ra. Tena Vakur de nê, Warê Pawitişî yê Medya de zî xebatê muhîmî kerdê û tewr pey zî Fermandara Herêma Awaşînî bîye. Heval Ronya girêdayîyê felsefeya Rayber Apoyî ya cinîya azade bîye û bi zanayîşê na felsefeye wezîfeyê xo ardê ca.

Embazanê sey Zelale, Berfîne, Reşît û Welatî zî domantîye ra beşdarê mucadeleyî bîyê û bi tecrube, cesaret û ferasetê xo, Zagrosan de derbeyê pîlî daye dişmenî ra. Nê hevalanê ma zî keda pîle daya û wezîfeyê xo bêqusir ardo ca. Ê do sey qehremanê Çarçella û Awaşînî bêrê yadkerdene û rayîrê ma her tim bikê roşnîye.

Bêguman yadkerdişê nê embazan, ganî bi pêtkerdişê mucadele û bi xoverdayîşan bo. Ganî ma dişmenî ra hesab bipersê û heyfê nê embazanê xo bigîrê. No rayîr zî rayîrê Rayber Apoyî û rayîrê azadîya şarê Kurdistanî ra vîyareno. Seba ke no mucadeleyo pîroz bibo serkewte, 17’ê Adare de hetê hêzanê Warê Zagrosî ra hamleya Şehîd Bager û Şehît Ronya ameya destpêkerdene û bi na hamleye do heyfê şehîdanê ma bêro girewtene û hêzê ma do wezîfeyê xo biyarê ca û derbeyanê pîlan do bidê dişmenî ra.

Ma şexsê Fermandaranê sey Bager Bedlîs û Ronya Qerse de şehîdanê xo reyna bi hurmet yad kenê û şexsê keyeyanê înan de serweşîya pêroyê Kurdistanî wazenê.”