Qeyûmê Wanî çarçewa xebatanê rayîrê dormeyî de dest na keye û erdê şarî ser. Qeyûm pê zorî malê şarî  keno ê umûmîye û 10 kesî zî erdêkî rê kerdî şirîk. Heta nika bi hezaran kesî nê kerdişî ra bîyî mexdûr. Wezaretê Dormeyî û qeyûm erdê şarî danê dîyanet, kesanê bînan. 

Qeyûmê Wanî binê madeya 18. de dest nano keye û erdê şarî ser. Xebatanê rayîrî ra semed xeylêk hemwelatîyî benê mexdûr.

Mexdûran ra Resûl Bazarî vat: ''Heta nika qeyûmî heman erdî rê 10 kesî kerdî şirîk. Her kes mexdûrê madeya 18. o. Erdê şarî danê ma ê ma danê şarî. Plansazîya înan hende aloz a. Ganî na mesele cade bêra çareserkerdene.''

Cafer Yadîgarî zî îfade kerd ke dewlete keyeyê ci da tay merdiman û erdê ci zî dayo dîyanetî. Yadîgarî vat: ''Verî ke wayîrê erdî de qisey bikerê mulkê ci pare kenê. Bi hezaran merdimî mexdûr ê. Erdlerzê Wanî zî hende zerar nêdabi. Ma nêzanenê se bikerê. Ma hêvî kenê ke na mesele çareser bena.''