Qeyûmê Îşxalkarî xo tayînê serekîya GABB'yî kerd!

Qeyûmê Amedî Hasan Basrî Guzeloglûyî xo tayînê ser serekîya GABB'yî kerd. Hetkaro ke Guzelogluyî erşawit kombîyayîşê GABB'î de zî  kursî îşxal kerd.

Vizêr kombîyayîşê Meclîs ê Dewro 2'yîn ê 2019 ê Yewîya Şaredarîyan ê Anatolîaya Başûrê Rojakewtene (GABB) ame viraştene.Walî Hasan Basrî Guzeloglûyo ke herinda Hemşaredarê  Amedî Selçûk Mizrakliyî de sey qeyûmî ameyo cakerdene, heman wextî de xo kerd wekîlê serekîya GABB'î, ke 21'ê Hezîrane Mizrakli sey serekê GABB'yî amebi weçînayene.

Guzeloglû tewrê kombîyayîşî nêbi, Hemşaredarê Elîhî serekîya GABB'yî kerdêne la qeyûmî hetkarê walîyî ke nameyê ci eşkera nêbi erşawit kombîyayîş. Kombîyayîş de Heyetê Îdare yê Herêmîyan ê Demokratîkan ê HDP'yî amade bîyî, seba ke qeyûm bêro şeqiznayene dokumentê tewirê xo wend.Kombîyayîşê Meclîsî çarçeweya madeya 14'ine ya nîzamnameyê GABB'yî de pê pêşnîyazê endaman ê HDP'yî ke ganî sereko newe yê yewîye bêro weçînayene, dest pêkerd. Nîzamname ame qebulkerdene. Dimayê qebulkerdişê nizamnameyî Şaredarê Şaredarîya Şirnexî yê AKP'yî Mehmet Yarakî vat hetkarê walîyî do qisey bike la endamanê meclîsî yê HDP'yî û  Şaredarê Erganî Ahmet Kayayî vat qiseykerdişê walîyî huqûqî nîyo û derheqê na rewşe de  nêrazîbîyayîşê xo mojna. Hetkarê Walîyî verba qiseykerdişê Kayayî kursî îşxal kerd û va: "Ez bi nameyê dewlete tîya de yo û pabeyê vengdayîş ê şima nîyo. Xura serekê yewîyaye esto û o zî walî yo."