Hêrişê dewleta tirke yê vera Başûrê Kurdîstanî dewam kenê. Hêrişanê hewayî yê dewleta tirke de qicî û cinîyî zî tede tewr 112 kesî ameyî ameyî qetilkerdene, bi seyan kesî birîndar bîyî. Tewr peynî de 26ê gulane de Bamernê de hîrê kesî  hetê dewleta tirke ra ameyî qetilkerdene.

Goreyê raporê  Buroyê CPTyî yê Iraqî  2015î ra heta 2021î hêrişê dewleta tirke yê vera herême de  109 sîvîlî ameyî qetilkerdene. Hêrişanê tewr pîlan ra yew tebaxa 2015î de dewa zergelê yê Qendîlî de ame kerdene. Hêriş de pîya bi cînîya digane 8 sîvîlî ameyî qetilkerdene û 27 kesî birîndar bîyî. Mabenê 2017 û 2018 de zî hêrişanê dewleta tirke de tewr tay 30 sîvîlî ameyî qetilkerdene. Hêrişê ke pêra ameyî kerdene ra tayî wina yê:

2019: 23ê çeleyî de bajarêke Dêralokî yê Amedîyê de 4 sîvîlî ameyî qetilkerdene. Naye ser o şarê Başûrî wirişt payan ser. Behdînanijan eşt baregehê leşkerî yê Sîrê ser û wesayîtê leşkerî dayî adir ver. Leşkeranê tirkan hêriş kerd, tîya di sîvîlî ameyî qetilkerdene û 6 sîvîlî birîndar bîyî. 25ê hezîrane de herêma Goşînî ya qezaya Soranî yê Hewlêrî de wesatîyo sîvîl ame pirodayene, di birayan ra yew ame qetilkerdene û bîn birîndar bi. 29ê hezîrane de dewa Berd Kuranî ya Koyê Kortekî de netîceya hêrişê teyarayanê artêşa tirke de babîyêk  pîya bi qicanê xo ame qetilkerdene û kesêk birîndar bi.

2020: 18ê hezîrane de hêrişê vera herêma Sidêkanî de kesêk ame qetilkerdene. 19ê hezîrane de  bajarekê Şeladizê yê Amedîyê ya Duhoku de dewleta tirke 5 kesî qetil kerdî. 24ê hezîrane de warê pîknîkî yê qezaya Şarbajêrî yê Silêmanî de 2 sîvîlî ameyî qetilkerdene. 27ê temuze de Amedîyê de netîceya bombardumanî de hîrê kesî ameyî qetilkerdene.

2021:  25ê gulane de netîceya hêrişê topan arêtşa tirke de dewa Deşişe dewijî birîndar bîyî. 26ê gulane de dewa Biherê de 2 birayanê ke heywanê xo çirnayêne raştê hêrişê dewleta tirke ameyî, wird birîya birîndar bîyî. 1ê hezîrane û 8ê temuze de Hirûre de 2 dewijî birîndar bîyî. 13ê tebaxe de dewijêk dewa Deşişe de ame pirodayene. 20ê tebaxe bajarekê Batifa yê Zaxo de 2 kesî ameyî qetilkerdene.

Rapor de dîya zanayene 2015î ra nata 109 kesî ameyî qetilkerdene, 120î ra zafêr birîndar bîyî. 648 dewî binê tehlukeyê vengkerdişî de yê. 150 dewî bi temamî ameyî vengkerdene.

Goreyê doneyanê CPTyî humare sîvîlanê ke ameyî qetikerdene 112 bo zî têna herêma Behdînan de 2015î ran ata 198 sîvîlî hetê artêşa tirke ya îşxalkere ra ameyî qetilkerdene. Pêroyê Başûrê Kurdîstanî de hûmara kesanê ke hêrişanê dewleta tirke de ameyî qetilkerdene hûmara ke ameya dayene ra zaf girdêr a.

Kesê ke hêrişê dewleta tirke yenê qetilkerdene hetê Hukmatê Herême Kurdîstanî ra sey şehîdan nînê îlankerdene û sebebê mergê înan zî sey fermî ca nêgeno.  Na rewşe remojena ke Hukmatê  Herêma Kurdîstanî senî sûcanê şerî yê ke dewleta tirke yê Başûr de vera kurdan kena, nimena.