14ê tebaxa 1993yî de  bi hezaran dewijî vera ferzkerdişê qoricîtîye, sereştiş û polîtîkayanê îşkenceyî yê dewleta tirke dewa Nexşanî de kom bibî. Girseyî dest pê rayraşîyayîşî kerd la 2 kîlometreyê dûrê dîgorî de verê înan ame girewtene. Tîya de hêzanê dewlete girse da guleyan ver, 5ê ci domanî 17 kurdî qetil kerdî û 200 kesî zî birîndar kerdî.

Gulcane Çagdavul (8 ), Selvîye Çagdavul (14), Yeter Kerenciler (13), Necla Geçener (14), Zarife Boylu (15), Erdal Bugan (17), Zeynepe Çagdavul (19), Hacere Hacioglu (20), Suna Çîdemal (21), Fatma Parlak (22), Faruk Aydin (27), Cemil Ozvariş (39), Giyasettîn Çalişci (41), Hasan Çagdavul (43), Suleyman Taş (47), Nurettîn Orun (80) û Tutîye Talan (66) cayê serebûtî de ameyî qetilkerdene. Mesuldarê serebûtî hema zî nêameyî mehkumkerdene.

Qirkerdişî ra dima rêçê çekanê tîmanê taybetan ra ber, rêçê çeka roketeştoxî ameyî dîyene. 

Muhakemekerdişê mesuldaranê qirkerdişî 11 serrî yo dewam keno la tede birêke nêdîyaye. Avûkatê dewa Tahîr Elçîyî 2004 de seba ke 'muhamekerdiş derg bîyo, 'tehqîqatêko hîra nêameyo kerdene' û 'heqê ciwîyayîşî ameyo binpaykerdene' dewa berde Mehkemeya Heqanê Merdiman a Ewropa (MHME).

Dima ke MHME dewa qebul kerde, mehkemeya dewleta tirke 2006 de îdîa kerd ke 'polîsan xo pawito' û polîsî vera dayî. Polîsan zî pawitişanê xo de îdîa kerd ke mîyanê şarî ra bi roketan 'ê dîyayê bombayan ver.' 

Dima ke Tirkîya bira veradayîşî daye MHME bira xo eşkera kerde û Tirkîya mekhuma tazmînatê madî û manewîyî kerde.

Ê rayraşîyayîşê dewijan de domanan kincê bi rengê kesk, sûr û zerdî xo rê daybî, flamayê bi nê rengan berz kerdbî. Leşkeranê artêşa tirke verê şarî girewt, pêser hêrişê cinî û ciwanan kerdbî. Qirkerdiş de bi giranî doman û cinîyî ameybî qirkerdene.

Qirkerdişî ra dima zî cenazayê tay dewijan peyê panzeran ra ameybî girêdayene û heta merkezê qeza ameybî kaşkerdene.

Şarê Dîgorî qirkerdişî ra dima, rixmê tedayan, îşkence û tepiştişî zî dewa xo nêteriknaye.