Heyetê DEM Partî yo ke Pervîne Buldan û Sirri Sureyya Onderî ra ameyê pê, derheqê pêvînayîşê xo yê bi Rayber Apoyî de eşkerayîyêke daye.

Eşkerayîye wina ya:

''Îmrali de Birêz Abdullah Ocalanî de ma 28ê kanûna 2024î de pêvînayîşêko hîra kerd. Weşîya ey hol bîye û moralê ci berz bi. Ercnayîşê ey ê serê çareserîya mende ya meseleya kurdan zaf girîng bîyî.

Pêvînayîş de serebûtê Tirkîya û Rojhelatê Mîyanênî ameyî ercnayene. Birêz Ocalanî pêvînayîş de vera senaryoyanê ke ameyoxêko tarî pêşkêş kerdêne pêşnîyazê pozîtîfî kerdî.

Çarçewaya fikr û nêzdîbîyayîşê Birêz Ocalanî bi hawayêkê pêroyî wina bîye:

-Ancî xurtkerdişê wayûbiratîya tirk û kurdan hem mesuldarîyêka tarîxî ya hem zî seba pêro şaran seke qederî dîyar bikero girîng û ecele yo.

-Seba ke proses ser bikewo ganî pêro dormeyê sîyasî yê Tirkîya bê hesabanê demkî û tengan înîsîyatîf bigêrê û bi pozîtîfî destekê prosesî bibê. Bêguman zemînanê nê destekan ê tewr girîngan ra yew zî Meclîs o.

-Serebûtanê Gazze û Sûrîye mojna ke na meseleya ke bi mudaxeleyanê teberî kangren bîya hinî çareserîya ci nêna taloqkerdene. Bi cidîyetê ney seba ke xebatî ser bikewê ganî muxalefet zî tewr bibo û pêşnîyazan bikero.

-Paradîgmaya newîya ke Birêz Bahçelî û Birêz Erdoganî hêz dayo ci, ez zî qerardar û ehîl a ke bi pozîtîfî destek bida ci.

-Heyet do nê nêzdîbîyayîşê mi dewlete de û dormeyanê sîyasîyan de pare bikero. Naye ser o ez amade ya ke gama pozîtîfe ya hewce bierza û veng bida.

-Nê xîretê ma yê pêroyînî seba ke welat aver şoro û demokratîk bibo, do bibê kilawuzêko qîmetîn.

-Seba Tirkîya û herême wext wextê haştîye, demokrasî û wayûbiratîye yo.

Rayaumûmîye rê bi rêzê mi.''