Rêxirawên Jinên Azadixwaz ên Kurdistan-RJAKî eşkera kerd ke ewro serê sibayî hêzanê asayîşî eşt merkezê înan ser û bê xeberdayîş û qerarê mehkeme merkezê înan qefilna. RJAKî veng da selahîyetdaran waşt wa qerar peyser bêro antene.

RJAKî derheqê sereştişê merkezê înan eşkerayîye çapemenîye daye û nê vatî:

Tam wexto ke problemê kurdan û çareserkerdişê meseleyanê şarê ma rojdem de yo û cinîyî her hetî ra wextê tengî de yê, ewro serê sibayî ekîbêkê asayîşî bê xeberdayîşî eşt merkezê ma ser û bê qerarê mehkeme merkezê ma qefilna

Dezgehê ma têna semedê çareserkerdişê problemanê cinîyan û pawitişê heqanê cinîyan ame akerdene. Sebe ke cinîyî aver şirê ma xeylê firsetî teqdîm kerdî. Ma xeylê aktîvîteyê romeyî kerdî û bi seyan dewayê cinîyan û dosyayê ci çareser kerdî.

Seba ke Mehkemeya Federale vato heme dezgeh û rêxistinê ke eleqaya înan bi têgêrayîşê azadîye est o wa bêrê qefilnayene dezgehê ma ame qefilnayene. Ma nê caardişî qebul  nêkenê. Dezgehê ma xoser o, eleqeya ci qet bi partîyanê sîyasîyan û awanîya bîne çîn o.

Selahîyetdaran rê vengdayîşê ma no yo: Binê tesîrê çewî de memanê, nê qerarê peyser biancê.''