Qezaya Kanîreşî ya Çewlîgî de rayîrê dewan pê çamure girewte yê. Hemwelatîyê dewanê Xişxişok û Şorika Jore  çamura rayîrî ra nêeşkenê xo biresnê merkezê qeza.

Badê helîyayîşê vewre û varayîşê şîlî herra rayîran bîye nerm. Wesayîtî rayîranê çamurînan de xeylêk zehmetîyan ancenê. Wesayîtê ke çamure de cum bîyî hemwelatîyê nêeşkene tira vejê.

Mînîbusa ke şîyêne dewa Xişxişokî çamurê rayîrî de cum bîye. Raywanan pey ra tan da mînîbuse û xîretan ra dima mînîbuse mîyanê çamurî ra vete. Reyna semedo ke wesayîtêko ke şîyêne dewa Şorika Jore zereyê çamure û lince de cum bîyî  cinîyêka kokime peya şîye dewe.

Hukmatê AKPyî ke têna qale de esto û xizmetê şarî nêkeno tewr zaf xo pê viraştişê rayîran wasifeno la nê dîmanan de halê rayîran zî eşkera eseno.