Meclîsê Ciwanan ê DEM Partî bi wesîleya rojbîyayîşê Rayber Apoyî yê 4ê Nîsane ver bi Amara rayraşîyayîşêkî keno. Roja hîrêyîne ya Rayraşîyayîşê Amara de Mustafa Dago ke 4ê nîsana 2009î de ‘Rayraşîyayîşê ver bi tîje’ de amebi qetilkerdene serê gorê xo de ame yadkerdene.

Ciwanan dewa Qerûkî de qeranfîlî nayî gorê Dagî ser û o yad kerd. Endama Koordînasyonê Cinîyan ê Ciwanan ê DEM Partî Elîfe Çoban yadkerdiş de qisey kerd û dîyar kerd ke ê têkoşînê Musfata Dagî rê dewam bikerê.

Babîyê Dagî Salîh Dagî vat: ‘’Mustafayî raywanî dîbî û cade o tewrê înan bibi.’’

Ciwanan dima Pirsûsî ra Rayber Apoyî rê mektubî şawitî.

Ciwanî şîyî Merkezê Kulturî yê Amara û 33 ciwanê ke 20ê temmuza 2015 de hêrişê bibombayî yê çeteyanê DAÎŞî de şehîd bîyî, ê yad kerdî. Ciwanî bi slogananê “Şehid namirin” û “Ey şehid xûna te li erdê namîne” kewtî merkezî.