Merkezê Cigêrayîşanê Tirkîya (CEFTUS) ê Parlamentoyê Ewropa de bi sernameyê ‘Tirkîya de prosesê haştîye, serebûtê rojaneyî û ameyoxî ra pawitişî’ panelêk ame kerdene.

Panelo ke Lord Matthew Elliottî moderatorîya ci kerde hetê xeylê nuştox, akademîsyen û sîyasetmedaran ra ame teqîbkerdene.

Prof. Dr. Mîthat Sancarî derheqê vengdayîşê 27ê Sibate yê Rayber Apoyî û prosesê peyê ci de qisey kerd. Sancarî pare kerd ke eke no proses ser bikewo pêro dinya rê do bibo nimûne. Sancarî vat: ‘’Seba ke PKK bira çekverdayîşî bigêro ganî bieşko ke raşta raşte lîderê xo de têkilîye virazo. Vengdayîşê ‘Haştîye û Komelê Demokratîkî’ yê Ocalanî asta tarîxî de ya. Seba serkewtişê nê prosesî ganî dewlete û îqtîdarê Tirkîya gamanê zelalan bierzê.

Parlamenterê Partîya DEVA Mehmet Emîn Ekmenî zî ard ziwan ke ê sey partîye paştî danê nê prosesî û vat: ‘’Ganî sebebê şîdetê têkoşînê çekdarî werte ra bêrê wedaritene. Seba ney zî ganî çarçeweyêka polîtîke û qanûnîye bêra viraştene. Nê prosesî de ganî Meclîs zî bi zelalî rolanê xo bîyaro ca.’’

Şaredara Dêrsimî ya verêne Nurhayate Altun îfade kerd ke îdareyanê herêmîyan (şaredarîyan) rewşa şerî ra zerarê pîlî dîyê û ganî îdareyanê herêmîyan de paradîgmaya xeta demokratîke, ekolojîke û azadîya cinîyan bêra caaedene.